Jeremia 28
1 N'të njajtin vit, n'fillim t'mbretnimit t'mbretit Zedekia t'Judës, n'vitin e katërt, n'mujin e pestë, profeti Hanania, djali i Azurit, pi Gibeoni, m'ka folë n'shpinë e Jehovait, para priftërinjve edhe krejt njerëzve, edhe m'ka thanë:
2 «Qekjo asht qka thotë Jehovai, Zoti i ushtrive, Zoti i Izraelit: ‘Unë kom me e thy zgjedhën e mbretit t'Babilonisë.
3 Brenda dy vjetëve kom me i kthy këtu krejt sendet e shpisë së Jehovait, që mbreti Nebukadnezar i Babilonisë i ka marrë pi këtij vendi edhe i ka çu n'Babiloni.’»
4 «‘Edhe Jekonjën, djalin e Jojakimit, mbretin e Judës, bashkë me krejt ata pi Juda që i kanë marrë robër n'Babiloni, kom me i kthy n'këtë vend’, thotë Jehovai, ‘se unë kom me e thy zgjedhën e mbretit t'Babilonisë.’»
5 Atëherë profeti Jeremia i ka folë profetit Hanania para priftërinjve edhe krejt njerëzve që rrishin n'shpinë e Jehovait.
6 Profeti Jeremia ka thanë: «Amen! Qashtu e boftë Jehovai! Jehovai i boftë realitet fjalët që i ke profetizu ti, edhe i ktheftë pi Babilonia n'këtë vend sendet e shpisë së Jehovait edhe krejt ata që i kanë marrë robër!
7 Po t'lutna, nguje qet mesazh që po ta thom ty edhe krejt njerëzve.
8 Profetët që kanë jetu moti, para meje edhe para teje, kanë profetizu luftë, fatkeqësi edhe murtajë kundër shumë vendeve edhe mbretnive t'mëdha.
9 Kur nji profet profetizon paqe edhe fjalët e tij dalin t'vërteta, atëherë ka me u ditë që Jehovai me t'vërtetë e ka çu atë profet.»
10 Atëherë profeti Hanania e ka marrë shufrën e zgjedhës pi qafa e profetit Jeremia edhe e ka thy.
11 Masanej Hanania ka thanë para krejt njerëzve: «Qekjo asht qka thotë Jehovai: ‘Qashtu, brenda dy vjetëve, kom me ia hjekë zgjedhën e mbretit Nebukadnezar t'Babilonisë pi qafa e krejt popujve edhe kom me e thy.’» Mas kësaj, profeti Jeremia ka shku rrugës së vet.
12 Mas Hanania e ka marrë shufrën e zgjedhës pi qafa e profetit Jeremia edhe e ka thy, Jeremisë i ka ardhë ky mesazh pi Jehovai:
13 «Shko edhe thuj Hananisë: ‘Qekjo asht qka thotë Jehovai: “Ti i ke thy shufrat e zgjedhës pi druni, po n'vend t'tyne ki me bo shufra pi hekuri.”
14 Se qekjo asht qka thotë Jehovai, Zoti i ushtrive, Zoti i Izraelit: “Unë kom me jau qit n'qafë nji zgjedhë pi hekuri krejt këtyne popujve, që me i shërby mbretit Nebukadnezar t'Babilonisë. Po, ata patjetër kanë me i shërby atij. Edhe kafshët e egra t'fushës kom me ia dhanë atij.”’»
15 Atëherë profeti Jeremia i ka thanë profetit Hanania: «N'goma mirë, Hanania! Jehovai s't'ka çu ty, po ti e ke bo qet popull me i besu nji rrene.
16 Për qata Jehovai thotë: ‘Unë kom me t'hekë pi faqja e dheut. Qet vit ki me dekë, se ti ke bo thirrje me u çu kundër Jehovait.’»
17 Edhe kështu, profeti Hanania ka dekë n'mujin e shtatë t'po atij viti.