Efesianëve 1
1 Pavli, apostull i Krishtit Jezus simas vullnetit të Zotit, të shenjtëve në Efes, besnikëve që janë të lidhun me Krishtin Jezus:
2 Ju uroj mirësi të pameritume edhe paqe pi Zoti, Ati jonë, edhe pi Zotnia Jezu Krisht.
3 Qoftë i lavdëruem Zoti edhe Ati i Zotnisë tonë Jezu Krisht, sepse aj na ka dhuru neve që jemi të lidhun me Krishtin çdo bekim frymor në vendet qiellore. 4 Aj na ka zgjedhë para themelimit të botës që me qenë të lidhun me të, që para tij me qenë të shenjtë edhe pa të metë në dashni. 5 Sepse simas dëshirës edhe vullnetit të vet, aj na caktoi përpara që përmes Jezu Krishtit me u pranu si bij të tij, 6 që me u lavdëru mirësia e tij e pameritume e lavdishme, që aj me mirësi na e tregoi përmes Birit të vet të dashtun. 7 Përmes tij, përmes gjakut të tij, e kemi çlirimin përmes shpërblesës, po, faljen e gabimeve tona. Kaq e madhe asht mirësia e tij e pameritume.
8 Këtë mirësi të pameritume aj e la me rrjedhë me bollëk mbi neve, me krejt mençurinë edhe arsyen, 9 tu na e bo të njohun sekretin e shenjtë të vullnetit të vet. Ky ka të bajë me dëshirën edhe qëllimin e tij, 10 që kur të mbërrijë koha e caktume, me vendosë nji rregullim për me i mbledhë prapë bashkë krejt senet në qiell edhe krejt senet në tokë në Krishtin. Po, në të, 11 me të cilin jemi të lidhun edhe jemi caktu si trashëgimtarë. Sipas qëllimit të Atij që e kryn gjithçka qysh e ka vendosë me vullnetin e vet, na jemi caktu përpara, 12 që na, të parët që kemi shpresu në Krishtin, me shërby për lavdërimin e lavdisë së tij. 13 Po edhe ju keni shpresu në të, kur e keni ni fjalën e së vërtetës, lajmin e mirë për shpëtimin tuej. Pasi u batë besimtarë, përmes tij e morët si vulë frymën e shenjtë të premtume, 14 që asht kapar i dhanë përpara për trashëgiminë tonë. Qëllimi asht me e çliru përmes shpërblesës pronën e vet të Zotit, për lavdërimin e lavdisë së tij.
15 Për këtë arsye edhe unë, prej kur kam ni për besimin tuej në Zotninë Jezus edhe për dashninë tuej ndaj krejt të shenjtëve, 16 nuk po nalem tu e falënderu Zotin për ju. Ju përmendi vazhdimisht në lutjet e mia, 17 që Zoti i Zotnisë tonë Jezu Krisht, Ati i lavdisë, t’ju japë nji frymë mençurie edhe ta kuptoni saktë atë që aj e zbulon. 18 Aj i ka çelë sytë e zemrës suej, që ta kuptoni në qfarë shprese ju ka thirrë, qfarë pasunie të lavdishme mban aj si trashëgimi për të shenjtit, 19 edhe sa jashtëzakonisht e madhe asht fuqia e tij ndaj neve që besojmë. Madhështia e saj shihet përmes veprimit të fuqisë së tij të madhe, 20 që e përdori kur e ringjalli Krishtin pi të dekuneve edhe e uli në anën e djathtë të vet në vendet qiellore, 21 shumë ma nalt se çdo qeveri, autoritet, fuqi, sundim edhe çdo emën që përmendet, jo veç në këtë sistem të botës, po edhe në atë që ka me ardhë. 22 Aj i vnoi edhe krejt senet nën kambët e tij, edhe e bani krye mbi gjithçka që ka të bajë me kongregacionin. 23 Ky asht trupi i tij edhe asht i mbushun me të, me atë që i mbush krejt senet në çdo mënyrë.