Letra i parë te Korintasve 12
1 Tash për dhuratat e Frymës, vllazni, nuk du që ju me kon pa njohni. 2 Ju e dini: kur keni qenë njerëz pi kombeve tjera, jeni ndiku edhe jeni çu te qata idhuj të pagojë, edhe i keni ndjekë kahdo që ju kanë çu. 3 Tash po du me ju bo me ditë që kurrkush nën ndikimin e Frymës së Zotit nuk thotë: “Jezusi asht i mallkum!” Edhe kurrkush s’mundet me thanë: “Jezusi asht Zotni!”, përveç përmes Frymës së shenjtë.
4 Tash ka dhurata të ndryshme, po asht e njejta Frymë. 5 Ka detyra të ndryshme shërbimi, po asht i njejti Zotni. 6 Ka edhe veprime të ndryshme, po asht i njejti Zot që i bon krejt qito në secilin. 7 Fryma shfaqet përmes secilit për nji qëllim të dobishëm. 8 Se njonit i jepen përmes Frymës fjalë mençurie, tjetrit simas të njejtës Frymë fjalë njohnie, 9 tjetrit besim përmes të njejtës Frymë, tjetrit dhurata shërimi përmes kësaj nji Fryme, 10 nji tjetër mundet me kry vepra të fuqishme, nji tjetër mundet me profetizu, nji tjetër mundet me i dallu shprehjet e frymëzume, nji tjetër fol në gjuhë të ndryshme, e prapë nji tjetër mundet me i përkthy. 11 Krejt qito veprime i ban nji e njejta Frymë, që ia ndan secilit simas qysh don.
12 Se qysh trupi asht nji, po ka shumë pjesë, edhe krejt pjesët e trupit, edhe pse janë shumë, e bojnë nji trup të vetëm, qashtu asht edhe me Krishtin. 13 Se krejt jemi pagëzu përmes të njejtës Frymë, që me bo nji trup të vetëm, qoftë Jehudi a Grekë, qoftë skllevër a të lirë, edhe krejtve na u dha me pi të njejtën Frymë.
14 Se trupi nuk përbahet veç pi nji pjese, po pi shumë pjesëve. 15 Nëse kamba kish me thanë: “Se nuk jom dorë, nuk jom pjesë e trupit”, a mos për qata s’asht pjesë e trupit? 16 Edhe nëse veshi kish me thanë: “Se nuk jom sy, nuk jom pjesë e trupit”, a mos për qata s’asht pjesë e trupit? 17 Nëse krejt trupi kish me kon sy, ku kish me kon dëgjimi? Nëse krejt kish me kon dëgjim, ku kish me kon nuhatja? 18 Po tash Zoti e ka vendosë secilën pjesë të trupit qysh ka dashtë vetë.
19 Nëse krejt kishin me kon e njejta pjesë e trupit, ku kish me kon trupi? 20 Po tash janë shumë pjesë të trupit, e prapë nji trup i vetëm. 21 Syri s’mundet me i thanë dorës: “S’kom nevojë për ty”, edhe kryet s’mundet me ju thanë kambëve: “S’kom nevojë për ju.” 22 Përkundrazi, pjesët e trupit që doken ma të dobëta janë të nevojshme, 23 edhe pjesët e trupit që i shohim si ma pak të nderume, i rrethojmë me ma shumë nder. Kshtu pjesët tona që s’doken aq hijshëm marrin ma shumë hijeshi, 24 kurse pjesët tona që doken mirë s’kanë nevojë për qita. Megjithatë, Zoti e ka bashku trupin në atë mënyrë që pjesës që i mungonte nderi, me ia dhanë ma shumë nder, 25 që mos me pasë ndamje në trup, po pjesët e tij me u kujdesë për njani-tjetrin. 26 Nëse nji pjesë e trupit vuen, krejt pjesët tjera vuejnë bashkë me të; edhe nëse nji pjesë nderohet, krejt pjesët tjera gëzohen bashkë me të.
27 Ju tash e formoni trupin e Krishtit, edhe secili pi juve asht pjesë e tij. 28 Zoti i ka vendosë disa në kuvend: së pari apostuj, së dyti profetë, së treti mësues; masanej ka të tillë që kryejnë vepra të fuqishme, a kanë dhurata shërimi, a ndihmojnë, a kanë aftësi me udhëheqë, a flasin në gjuhë të ndryshme. 29 A janë krejt apostuj? A janë krejt profetë? A janë krejt mësues? A kryejnë krejt vepra të fuqishme? 30 A kanë krejt dhurata shërimi? A flasin krejt në gjuhë? A munden krejt me përkthy? 31 Ama vazhdoni me u mundu për dhuratat ma të mëdhaja. Edhe tash po ju kallxoj nji udhë edhe ma të lartë.