Jeremia 29
1 Këto jonë fjalët e letrës që profeti Jeremia e ka çu pi Jerusalemit te pleqtë që kishin mbetë mes atyne që i kanë marrë rob, te priftat, te profetët edhe te krejt njerëzit që Nebukadnezari i ka marrë rob pi Jerusalemit e i ka çu n'Babiloni.
2 Kjo ka ndodhë masi mbreti Jekonja, nana e mbretit, zyrtarët e pallatit, prijësit e Judës edhe t'Jerusalemit, mjeshtrit edhe punëtorët e metalit janë largu pi Jerusalemit.
3 Jeremija e ka çu letrën me Elasën, djalin e Shafanit, edhe Gemarjan, djalin e Hilkias, që mbreti Zedekia i Judës i ka dërgu te mbreti Nebukadnezar i Babilonisë, n'Babiloni. N'letër shkrujke:
4 “Kështu thotë Jehovai, Zoti i ushtrive, Zoti i Izraelit, krejt atyne që unë i kam çu rob pi Jerusalemit n'Babiloni:
5 ‘Ndërtoni shpija edhe jetoni n'ato shpija. Mbjellni kopshte edhe hani pi frytet e tyne.
6 Merrni gra edhe bani djem e vajza. Martojini djemtë tuaj edhe jepini vajzat tuaja për martesë, që edhe ata me ba djem e vajza. Shtohuni edhe mos u pakësoni.
7 Mundohuni me pasë paqe n'qytetin ku ju kam çu rob edhe lutjuni Jehovait për atë qytet, se nëse aj qytet ka paqe, edhe ju keni me pasë paqe.
8 Se kështu thotë Jehovai, Zoti i ushtrive, Zoti i Izraelit: “Mos i leni profetët edhe fallxhorët që i keni mes jush me ju mashtru, edhe mos i ndëgjoni andrrat që ata i shohin.
9 Se ata po profetizojnë rrena n'emnin tem. Unë s'i kam çu”, thotë Jehovai.’”
10 “Se kështu thotë Jehovai: ‘Kur t'kalojnë 70 vjet n'Babiloni, unë kam me u kujdesë për ju, kam me e mbajtë premtimin tem edhe kam me ju kthy n'këtë vend.’
11 ‘Se unë e di mirë qka kam n'mend për ju’, thotë Jehovai. ‘Kam n'mend me ju dhanë paqe e jo fatkeqësi. Du me ju dhanë nji t'ardhme edhe nji shpresë.
12 Ju keni me m'thirrë, keni me ardhë e me m'u lutë, edhe unë kam me ju ndëgju.’
13 ‘Ju keni me m'lypë edhe keni me m'gjetë, se keni me m'lypë me krejt zemrën tuaj.
14 Edhe unë kam me ju lanë me m'gjetë’, thotë Jehovai. ‘Kam me i mbledhë ata t'juajt që janë rob edhe kam me ju bashku pi krejt popujt edhe pi krejt vendet ku ju kam shpërnda’, thotë Jehovai. ‘Kam me ju kthy n'atë vend pi ku ju kam marrë rob.’
15 Po ju keni thanë: ‘Jehovai na ka caktu profetë n'Babiloni.’
16 Kështu thotë Jehovai për mbretin që rrin n'fronin e Davidit edhe për krejt njerëzit që jetojnë n'këtë qytet, për vllaznitë tuaj që s'janë marrë rob bashkë me ju:
17 ‘Kështu thotë Jehovai, Zoti i ushtrive: “Kam me i goditë me shpatë, uri edhe murtajë, edhe kam me i ba si fiqtë e kalbun, që jonë aq t'kqij sa s'munden me u hangër.”’
18 ‘Edhe kam me i ndjekë me shpatë, uri edhe murtajë. Kam me i ba nji pamje tmerri për krejt mbretnitë e tokës. Kanë me u ba shembull mallkimi, nji sen i tmerrshëm, kanë me u përqeshë edhe kanë me mbetë me marre mes krejt popujve ku kam me i shpërnda,
19 se ata s'i kanë ndëgju fjalët e mia’, thotë Jehovai, ‘që ua kam çu përmes shërbëtorëve t'mi, profetëve, vazhdimisht, prapë e prapë.’ ‘Po ju s'keni ndëgju’, thotë Jehovai.
20 Për qata, ndëgjoni fjalët e Jehovait, krejt ju që ju kam çu rob pi Jerusalemit n'Babiloni.
21 Kështu thotë Jehovai, Zoti i ushtrive, Zoti i Izraelit, për Ahabin, djalin e Kolajës, edhe për Zedekian, djalin e Maasejës, që po ju profetizojnë rrena n'emnin tem: ‘Kam me i dorëzu n'duart e mbretit Nebukadnezar t'Babilonisë, edhe aj ka me i vra para syve tuaj.
22 Edhe ajo që ka me ju ndodhë atyne ka me u ba nji mallkim që kanë me e përdorë krejt ata t'Judës që i kanë marrë rob e i kanë çu n'Babiloni. Kanë me thanë: “Jehovai t'baftë si Zedekian edhe Ahabin, që mbreti i Babilonisë i ka pjekë n'zjarr!”
23 Se ata kanë ba sene t'turpshme n'Izrael. Kanë ba tradhti bashkëshortore me gratë e njerëzve tjerë edhe kanë folë rrena n'emnin tem, fjalë që unë s'ua kam urdhnu me i thanë. “Unë e di këtë sen edhe jom dëshmitar”, thotë Jehovai.’”
24 “Edhe Shemajës pi Nehelamit ke me i thanë:
25 ‘Kështu thotë Jehovai, Zoti i ushtrive, Zoti i Izraelit: “Ti ke çu letra n'emnin tand te krejt njerëzit e Jerusalemit, te prifti Zefanja, djali i Maasejës, edhe te krejt priftat tjerë, tu ju thanë:
26 ‘Jehovai t'ka caktu ty si prift n'vend t'priftit Jehojada, që ti me u ba përgjegjës për shpinë e Jehovait. Edhe çdo njeri t'marrë që sillet si profet, ti duhet me e mbajtë nën kontroll, me e futë n'pranga t'drunit edhe me ia lidhë qafën me hekur.
27 Atëherë pse s'e ke ndalë Jeremian pi Anatothi, që po sillet si profet mes jush?
28 Se aj na ka çu fjalë deri këtu n'Babiloni, tu na thanë: “Kjo ka me zgjatë shumë! Ndërtoni shpija edhe jetoni n'ato shpija. Mbjellni kopshte edhe hani pi frytet e tyne…”’”’”
29 Kur prifti Zefanja e ka lexu këtë letër para profetit Jeremia, që edhe aj me e ndëgju,
30 Jeremias i ka ardhë kjo fjalë pi Jehovait:
31 “Çoju fjalë krejt atyne që janë marrë rob edhe thuaju: ‘Kështu thotë Jehovai për Shemajan pi Nehelamit: “Shemaja ju ka profetizu, edhe pse unë s'e kam çu, edhe asht mundu me ju shty me u besu rrenave.
32 Për qata, kështu thotë Jehovai: ‘Kam me e ndëshku Shemajan pi Nehelamit edhe pasardhësit e tij. Asnjani pi familjes së tij s'ka me mbetë gjallë mes këtij populli, edhe aj s'ka me e pa t'mirën që unë kam me ia ba popullit tem’, thotë Jehovai, ‘se aj i ka shty njerëzit me u çu kundër Jehovait.’”’”