Ezekiel 16
1 Prapë më erdh nji mesazh pi Jehovait. Thojke kështu:
2 „O bir i njeriut, kallxoja qytetit të Jerusalemit krejt punët e neveritshme që i ka bo.
3 Thuaji: ‚Kështu thotë Zotnia Jehova, Sundimtari i krejtve, për Jerusalemin: „Ti e ke prejardhjen edhe je lindë n'vendin e kananitëve. Baba yt u konë amorit, e nana jote u konë hetite.
4 Kur ke lindë ti, qeshtu ka ndodhë: Atë ditë që ke ardh n'këtë botë, kërthiza s't'u ka pre, s'të kanë la me ujë për me t'pastru, s'të kanë fërku me krypë, as s'të kanë pshtjellë me pelena.
5 Kërkujt s'i ka ardh gjynah për ty, sa me ta bo naj njonën pi këtyne seneve. Kërkush s'ka pas dhimt për ty. Përkundrazi, të kanë gjujt n'fushë t'hapët, se atë ditë që ke lindë, të kanë urry.
6 Kur kom kalu atypari, të kom pa tu u përpëlítë n'gjakun tand. E qashtu, tu nejtë n'gjakun tand, të kom thanë: ‚Ke me jetu!‘ Po, kur ishe shtri n'gjakun tand, të kom thanë: ‚Ke me jetu!‘
7 Të kom bo me u shumzu fort, si bimët që mbijnë n'fushë. Ti je rritë, je zhvillu mirë edhe ke mbajt stolitë ma të mira. Gjinjtë t'u kanë forcu, flokët t'janë rritë, po ti hala ishe krejt cullak, pa kurrfarë teshe.“‘
8 ‚Kur kom kalu atypari edhe të kom pa, e kom vërejtë që ti ishe rritë boll për me t'u shpreh dashnia. Për qata, e kom shtri petkun tem përmbi ty edhe ta kom mbulu trupin cullak. Ta kom dhanë besën me betim edhe kom bo nji besëlidhje me ty‘, thotë Zotnia Jehova, Sundimtari i krejtve, ‚edhe pi atëherë ti m'ke taku mu.
9 Edhe të kom la me ujë, ta kom shpërla gjakun edhe të kom ly me vaj.
10 Masanej të kom veshë me tesha të qëndisuna, të kom dhanë sandale pi lëkure t'mirë, të kom pshtjellë me pëlhurë të hollë liri edhe të kom veshë me tesha të shtrejta.
11 Të kom zbukuru me stoli, t'i kom vnu byzylykë n'duer edhe nji zingjir n'qafë.
12 Ta kom vnu nji unazë n'hundë, vathë n'veshë edhe nji kunorë t'bukur n'kry.
13 Ti vazhdimisht je zbukuru me ari e argjend, edhe teshat tua jonë konë pi liri i hollë, pi pëlhurë e shtrejtë edhe pi tesha të qëndisuna. Ke hangër miell të mirë, mjaltë edhe vaj. Je bo shumë, shumë e bukur, edhe n'fund u bone e denjë me konë mbretneshë.‘“
14 „‚Zani yt ka nisë me u përhapë mes popujve për bukurinë tane. Bukuria jote u konë e përkryme, se unë ta kom dhanë shkëlqimin tem‘, thotë Zotnia Jehova, Sundimtari i krejtve.“
15 „‚Po ti ke nisë me i besu gjithnjë e ma shumë bukurisë tane, edhe për shkak të famës që e ke pasë, je bo prostitutë. Ti ia ke ofru veten lirisht secilit që ka kalu atypari, edhe bukuria jote i ka taku atij.
16 Ti i ke marrë do pi teshave tua edhe me to i ke rregullu vendet e nalta me ngjyra të ndryshme, ku je marrë me prostitucion. Qesi sene s'guxojnë me ndodhë, kurrë s'duhet me ndodhë!
17 I ke marrë edhe stolitë tua të bukura pi ari e argjendi që unë t'i kom dhanë, edhe pi tyne i ke bo vetes idhuj n'formë të burrave, e je marrë me prostitucion me ta.
18 I ke marrë teshat tua të qëndisuna edhe i ke mbulu ata idhuj me to. Ju ke ofru edhe vajin tem e temjanin tem.
19 Edhe bukën që unë ta kom dhanë, që u bo pi miellit të mirë, vajit edhe mjaltit që t'i kom dhanë unë, ua ke ofru edhe atyne, që me u çu nji erë e mirë. Bash qashtu ka ndodhë‘, thotë Zotnia Jehova, Sundimtari i krejtve.“
20 „‚Ti i ke marrë djemtë edhe çikat e tua, që m'i ke lindë mu, edhe ua ke bo kurban idhujve, që me i përpi ata. A s'të ka mjaftu hala prostitucioni yt?
21 Ti i ke pre djemtë e mi edhe i ke djegë si kurban.
22 Me krejt punët e tua të neveritshme edhe prostitucionin tand, ti s'i ke kujtu ditët e rinisë tane, kur ishe krejt cullak, pa kurrfarë teshe, edhe përpëliteshe n'gjakun tand.
23 Mas krejt të këqijave që i ke bo, mjerë ti! Mjerë ti!‘, thotë Zotnia Jehova, Sundimtari i krejtve.
24 ‚Ti e ke ngrit nji kodër edhe ke bo nji vend të naltë n'çdo shesh publik.
25 N'vendet ku shihen ma së shumti, n'çdo rrugë, i ke ngrit vendet e tua të nalta. Bukurinë tane e ke kthy n'diçka të neveritshme, se ia ke ofru veten secilit që ka kalu atypari, edhe je marrë gjithnjë e ma shumë me prostitucion.
26 Je marrë me prostitucion me bijtë e Egjiptit, kojshitë e tu plot epsh, edhe m'ke fy me prostitucionin tand pa fund.
27 Tash unë kom me e çu dorën teme kundër teje, kom me ta pakësu ushqimin edhe kom me të lonë n'dorë të atyne që të urrejnë, bijave të filistinëve, që jonë tmerru pi sjelljeve tua të turpshme.
28 Ti je marrë me prostitucion edhe me bijtë e Asirisë, se kurrë s'ke pas boll. Po edhe mas kësaj, hala s'je ngi.
29 Për qata je marrë edhe ma shumë me prostitucion, deri n'vendin e tregtarëve edhe te kaldeasit, po as atëherë s'ke pas boll.
30 Sa e smutë u konë zemra jote‘, thotë Zotnia Jehova, Sundimtari i krejtve, ‚kur i ke bo krejt këto sene edhe je sillë si nji prostitutë pa pikë marre!
31 Po kur e ke ngrit kodrën tane n'vendin ku shihet ma së shumti, n'çdo rrugë, edhe e ke bo vendin tand të naltë n'çdo shesh publik, ti s'je sillë si prostitutat tjera, se s'ke pranu kurrfarë pagese.
32 Ti je si nji grue që e tradhton burrin e vet, se i don ma shumë burrat e huj se burrin tand.
33 Krejt prostitutat marrin dhurata, po ti ju jep dhurata krejt atyne që të lakmojnë, madje ju jep edhe ryshfet që me ardh pi krejt anëve te ti për me u marrë me prostitucion.
34 Ti e bon krejt të kundërtën pi prostitutave tjera. Kurrnjona s'e bon qysh e bon ti! Ti i pagun të tjerët, n'ven që ata me të pagu ty. Ti e bon bash të kundërtën.‘
35 Për qata, oj prostitutë, ngoj fjalët e Jehovait.
36 Kështu thotë Zotnia Jehova, Sundimtari i krejtve: ‚Se ti i je dhanë epshit tand pa kurrfarë kufini edhe e ke kallxu trupin tand cullak, tu u marrë me prostitucion me dashnorët e tu edhe me krejt idhujt e tu të flliqtë e të neveritshëm, të cilëve ua ke bo kurban bile edhe gjakun e djemve tu,
37 për qata unë kom me i mbledhë krejt dashnorët që i ke kënaqë, krejt ata që i ke dashtë, bashkë me ata që i ke urry. Kom me i mbledhë pi krejt anëve kundër teje, edhe kom me ua kallxu trupin tand cullak, që ata me të pa krejt cullak.
38 Unë kom me ta dhanë dënimin që e meritojnë gratë që e tradhtojnë burrin edhe gratë që derdhin gjak. Gjaku yt ka me u derdhë pi zemërimit edhe xhelozisë.
39 Kom me të lonë n'duert e tyne, edhe ata kanë me t'i shkatërru kodrat e me t'i rrëzu vendet e nalta. Kanë me t'i zhveshë teshat, kanë me t'i marrë stolitë e tua të bukura edhe kanë me të lonë krejt cullak, pa kurrfarë teshe.
40 Ata kanë me e mbledhë nji kallabllak njerzish kundër teje, kanë me të gjujt me gurë edhe kanë me të mbytë me shpatat e tyne.
41 Kanë me t'i djegë shpitë edhe kanë me ta dhanë dënimin para syve të shumë grave. Unë kom me i dhanë fund prostitucionit tand, edhe ti s'ke me i pagu ma dashnorët e tu.
42 Kom me e shfry zemërimin tem kundër teje, edhe mërzia jem me ty ka me m'u largu. Kom me u qetsu edhe s'kom me u ndi ma i fyem.‘
43 ‚Se ti s'i ke kujtu ditët e rinisë tane, po m'ke zemëru me krejt këto punë që i ke bo, tash unë kom me bo që pasojat e sjelljeve tua me të ra mbi kry‘, thotë Zotnia Jehova, Sundimtari i krejtve, ‚edhe ti s'ke me i vazhdu ma sjelljet e tua të turpshme edhe krejt punët tua të neveritshme.
44 Krejt ata që kanë qef me thanë fjalë të urta, kanë me e thanë për ty këtë fjalë: „Qysh nana, qashtu çika!“
45 Ti je çika e asaj nane që e ka përbuz burrin e vet edhe fëmijët e vet. Edhe ti je motra e atyne motrave që i kanë përbuz burrat edhe fëmijët e vet. Nana juaj u konë hetite, e baba juaj u konë amorit.‘“
46 „‚Motra jote ma e madhe asht Samaria, që jeton me çikat e veta n'veri tand, e motra jote ma e vogël, që jeton n'jug tand, asht Sodoma me çikat e veta.
47 Ti jo veç që ke ecë rrugëve të tyne edhe i ke bo punët e tyne të neveritshme, po për pak kohë je bo edhe ma e prishun se ato n'krejt sjelljet tua.
48 Pasha jetën teme!‘, thotë Zotnia Jehova, Sundimtari i krejtve. ‚Motra jote Sodoma edhe çikat e saj s'i kanë bo ato sene që i ke bo ti me çikat e tua.
49 Ky u konë faji i motrës tane, Sodomës: Ajo edhe çikat e saj jonë konë krenare, kanë pasë ushqim me bollëk edhe kanë jetu rahat, pa halle, po prapë s'ju kanë ndihmu atyne që s'kanë mujtë me i ndihmu vetes, as të vorfnve.
50 Ato kanë vazhdu me u mbajtë nalt edhe me i bo punët e tyne të neveritshme para syve t'mi. Për qata, s'më ka metë tjetër veç me i largu.
51 Edhe Samaria s'e ka bo as gjysmën e gjynaheve tua. Ti i ke shtu punët e tua të neveritshme shumë ma shumë se motrat e tua, sa që për shkak të krejt punëve tua të neveritshme, ato doken ma të drejta se ti.
52 Tash ti duhet me e duru poshtnimin tand, se me sjelljet tua ke bo që motrat e tua me u dokë të drejta. Se ti ke bo gjynahe edhe ma të neveritshme se ato, e për qata ato jonë ma të drejta se ti. Tash të vjen marre edhe duroje poshtnimin tand, se ti ke bo që motrat e tua me u dokë të drejta.‘
53 ‚Unë kom me i mbledhë robërit e tyne, robërit e Sodomës edhe të çikave të saj, edhe robërit e Samarisë edhe të çikave të saj. Bashkë me ta kom me i mbledhë edhe robërit e tu,
54 që ti me e duru poshtnimin tand. Edhe ka me t'ardh marre për qka ke bo, se me punët tua ti i ke ngushllu ato.
55 Motra jote Sodoma me çikat e saj, edhe motra jote Samaria me çikat e saj, kanë me u kthy n'gjendjen që e kanë pasë ma herët. Edhe ti me çikat e tua keni me u kthy n'gjendjen që e keni pasë ma herët.
56 Kur ishe plot krenari, motra jote Sodoma për ty s'ka vlejtë as me ia përmendë emnin,
57 para se me dalë sheshit ligësia jote. Tash bijat e Sirisë edhe kojshitë e tyne po të shajnë, e bijat e filistinëve që jonë rreth teje po të përbuzin.
58 Ti ke me i bartë pasojat e sjelljeve tua të turpshme edhe të punëve tua të neveritshme‘, thotë Jehova.“
59 „Se kështu thotë Zotnia Jehova, Sundimtari i krejtve: ‚Tash unë kom me vepru me ty qysh ke vepru ti, se ti e ke përbuz betimin kur e ke thy besëlidhjen teme.
60 Po unë kom me e kujtu besëlidhjen që e kom bo me ty n'ditët e rinisë tane, edhe kom me bo me ty nji besëlidhje që ka me zgjatë përgjithmonë.
61 Ti ke me i kujtu sjelljet tua edhe ka me t'ardh marre kur ki me i pranu motrat e tua, si ato që jonë ma të mëdhaja se ti, ashtu edhe ato që jonë ma të vogla se ti. Unë kom me t'i dhanë ato si çika, po jo për shkak të besëlidhjes tane.‘
62 ‚Unë vet kom me bo besëlidhjen teme me ty, edhe ti ke me e kuptu që unë jom Jehova.
63 Atëherë ti ke me i kujtu krejt ato sene, edhe ka me t'ardh aq shumë marre, sa s'ke me mujtë as gojën me e çelë pi poshtnimit, kur unë kom me ta shly fajin, edhe pse i ke bo krejt ato sene‘, thotë Zotnia Jehova, Sundimtari i krejtve.“