Jeremia 24
1 Masanej Jehovai m'i ka kallxu dy shporta me fiq që rrishin para tempullit t'Jehovait. Kjo ka ndodhë masi mbreti Nebukadnezar i Babilonisë e ka marrë rob Jekonjan, djalin e Jojakimit, mbretin e Judës, bashkë me princat e Judës, mjeshtrit edhe punëtorët e metalit, edhe i ka çu pi Jerusalemit n'Babiloni.
2 N'njanën shportë ka pasë fiq shumë t'mirë, si fiqtë e parë që piqen herët, po n'shportën tjetër ka pasë fiq shumë t'kqij, aq t'kqij sa s'mujshin me u hangër.
3 Atëherë Jehovai m'ka vetë: “Qka po sheh, Jeremia?” Unë i kam thanë: “Fiq. Fiqtë e mirë jonë shumë t'mirë, po fiqtë e kqij jonë shumë t'kqij, aq t'kqij sa s'munden me u hangër.”
4 Masanej m'ka ardhë kjo fjalë pi Jehovait:
5 “Kështu thotë Jehovai, Zoti i Izraelit: ‘Qysh jonë t'mirë këta fiq, qashtu kam me i pa si t'mirë edhe ata t'Judës që i kam çu rob pi këtij vendi n'vendin e kaldeasve.
6 Kam me i pasë nën kujdes për t'mirën e tyne edhe kam me i kthy n'këtë vend. Kam me i ndërtu e s'kam me i rrënu, kam me i mbjellë e s'kam me i shkulë.
7 Kam me ua dhanë nji zemër që m'njeh mu edhe e din që unë jom Jehovai. Ata kanë me u ba populli jem, e unë kam me u ba Zoti i tyne, se ata kanë me u kthy te unë me krejt zemrën e tyne.
8 Po për fiqtë e kqij, që jonë aq t'kqij sa s'munden me u hangër, Jehovai thotë: “Qashtu kanë me u konë n'sytë e mi edhe Zedekia, mbreti i Judës, princat e tij, ata t'Jerusalemit që kanë me mbetë n'këtë vend, edhe ata që jetojnë n'Egjipt.
9 Kam me i ba nji shembull tmerri edhe fatkeqësie për krejt mbretnitë e tokës. Kanë me u ba turp e fjalë n'gojë t'njerëzve, kanë me u përqeshë edhe me u mallku n'krejt vendet ku kam me i shpërnda.
10 Edhe kam me i goditë me shpatë, uri e murtajë, derisa t'zhduken pi vendi që ua kam dhanë atyne edhe t'parëve t'tyne.”’”