Isaia 36
1 Në vitin e 14-të t'mbretërimit t'mbretit Hiskia, mbreti Sanherib i Asirisë ka ardhë kundër krejt qyteteve t'fortifikuara t'Judës edhe i ka pushtu.
2 Pastaj mbreti i Asirisë e ka çu Rabshaken me nji ushtri shumë t'madhe pi Lakishi n'Jerusalem, te mbreti Hiskia. Ata jonë ndalë te kanali i ujit i pellgut t'epërm, afër rrugës së madhe që çon te fusha e larësve t'rrobave.
3 Atëherë Eljakimi, djali i Hilkijas, që e ka pas nën kujdes pallatin, bashkë me sekretarin Shebna edhe Joahun, djalin e Asafit, që i ka mbajtë shënimet e ngjarjeve, kanë dalë me e taku.
4 Rabshake ju ka thanë: «Ju lutem, thujini Hiskias: 'Mbreti i madh, mbreti i Asirisë, po t'thotë kështu: "Te kush po e ki besimin?
5 Ti po thu: 'Unë kom plan edhe forcë t'mjaftueshme për luftë.' Po këto jonë veç fjalë boshe. Te kush po e ki besimin, që po guxon me u çu kundër meje?
6 Ti po mbështetesh veç te Egjipti, që asht si nji kallam i thyem, që kur dikush mbështetet në të, ia shpon shuplakën e dorës. Qashtu i ndodh kujtdo që mbështetet te faraoni, mbreti i Egjiptit.
7 Ndoshta ti po thu: 'Na kemi besim te Jehovai, Zoti jonë.' Po a s'asht Hiskia aj që i ka hjekë vendet e tij t'adhurimit n'vende t'nalta edhe altarët e tij, e i ka thanë Judës e Jerusalemit: 'Para këtij altari keni me u përkulë'?"'
8 Tash, t'lutna, lidhe nji bast me zotninë tem, mbretin e Asirisë: Unë t'i jap 2.000 kuaj, nëse ti munesh me gjetë kalorës t'mjaftueshëm për ta.
9 Qysh ki me mujtë me e detyru me u tërhjekë qoftë edhe nji guvernator t'parëndësishëm t'zotnisë tem, edhe nëse mbështetesh te qerret e luftës e kalorësit e Egjiptit?
10 A thu kom ardhë unë kundër vullnetit t'Jehovait për me e shkatërru këtë vend? Vetë Jehovai m'ka urdhnu: 'Hyn n'këtë vend edhe shkatërroje.'»
11 Atëherë Eljakimi, Shebna edhe Joahu i kanë thanë Rabshakes: «T'lutna, fol me neve, shërbëtorët e tu, aramaisht, se na e kuptojmë këtë gjuhë. Po mos fol n'gjuhën e judenjve para njerëzve që jonë mbi mur.»
12 Rabshake ju ka përgjigjë: «A thu zotnia jem m'ka çu veç te ju edhe te zotnia juaj për me i thanë këto fjalë? Kjo ka t'bojë edhe me burrat që jonë mbi mur, që bashkë me ju kanë me e hangër jashtëqitjen e vet edhe kanë me e pi urinën e vet.»
13 Pastaj Rabshake ka bërtitë me za t'naltë n'gjuhën e judenjve: «Dëgjoni fjalët e mbretit t'madh, mbretit t'Asirisë!
14 Mbreti po ju thotë kështu: 'Mos e lini Hiskian me ju mashtru. Aj s'munet me ju shpëtu.
15 Edhe mos e lini Hiskian me ju shty me pas besim te Jehovai, edhe nëse ju thotë: "Jehovai ka me na shpëtu pa tjetër. Ky qytet s'ka me ra n'duart e mbretit t'Asirisë."
16 Mos e dëgjoni Hiskian, se mbreti i Asirisë po thotë kështu: "Boni paqe me mu edhe dorëzohuni. Atëherë secili ka me hangër pi hardhia e vet e pi fiku i vet, edhe ka me pi ujë pi rezervuarit t'vet,
17 deri sa t'vij unë e me ju çu n'nji vend që asht si vendi juaj, ku ka drithë e venë t're, bukë e vreshta.
18 Mos e lini Hiskian me ju rrejtë kur ju thotë: 'Jehovai ka me na shpëtu.' A ka mujtë najni pi zotat e popujve me e shpëtu vendin e vet pi duart e mbretit t'Asirisë?
19 Ku jonë zotat e Hamathit e t'Arpadit? Ku jonë zotat e Sefarvajimit? A kanë mujtë ata me e shpëtu Samarinë pi duart e mia?
20 Asnji pi këtyne zotave s'ka mujtë me e shpëtu vendin e vet pi duart e mia. Atëherë qysh ka me mujtë Jehovai me e shpëtu Jerusalemin?"'»
21 Po ata kanë nejtë t'heshtun. Kërkush s'ia ka kthy asnji fjalë, se mbreti i ka urdhnu: «Mos iu përgjigjni.»
22 Pastaj Eljakimi, djali i Hilkijas, që e ka pas nën kujdes pallatin, sekretari Shebna edhe Joahu, djali i Asafit, që i ka mbajtë shënimet e ngjarjeve, kanë shku te Hiskia me rroba t'shqyera edhe ia kanë tregu krejt qka ka thanë Rabshake.