Jeremia 38
1 Shefatja, djali i Matanit, Gedalja, djali i Pashhurit, Juhali, djali i Shelemjës, edhe Pashhuri, djali i Malkisë, i kanë ni fjalët që Jeremia po ia thojke krejt popullit:
2 «Qekjo asht qka thotë Jehovai: ‘Kush mbetet n'këtë qytet, ka me dekë pi shpata, uria edhe murtaja. Po kush ju dorëzohet kaldeasve, ka me mbetë gjallë. Aj ka me e marrë jetën e vet si plaçkë edhe ka me jetu.’
3 Qekjo asht qka thotë Jehovai: ‘Ky qytet pa tjetër ka me iu dorëzu ushtrisë së mbretit t'Babilonisë, edhe aj ka me e pushtu.’»
4 Atëherë burrat kryesorë i kanë thanë mbretit: «T'lutna, bone që ky njeri me u mbytë, se me fjalët e veta po ua hup guximin ushtarëve që kanë mbetë n'këtë qytet, edhe krejt njerëzve tjerë. Se ky njeri s'po don paqe për këtë popull, po po don me i pa n'fatkeqësi.»
5 Mbreti Zedekia ju ka thanë: «E keni n'dorë ju, se mbreti s'munet me ju ndalë.»
6 Kështu që ata e kanë marrë Jereminë edhe e kanë gjujtë n'pusin e Malkisë, djalit t'mbretit, që u konë n'oborrin e rojës. Jereminë e kanë lshu poshtë me konopa. N'pus s'ka pasë ujë, po veç lloq, edhe Jeremia ka nisë me u fundosë n'lloq.
7 Ebed-Meleku, etiopiani, nji eunuk n'pallatin e mbretit, e ka marrë vesh që Jereminë e kanë gjujtë n'pus. Mbreti n'atë kohë u konë ulë te Porta e Beniaminit.
8 Atëherë Ebed-Meleku ka dalë pi pallatit edhe ka shku me folë me mbretin. Aj i ka thanë:
9 «O zotnia jem, o mbret, këta burra i kanë bo shumë keq profetit Jeremia! E kanë gjujtë n'pus edhe aty ka me dekë pi uria, se n'qytet s'ka mbetë ma bukë.»
10 Atëherë mbreti e ka urdhnu Ebed-Melekun, etiopianin: «Merri 30 burra me veti pi këtu edhe nxirre profetin Jeremia pi pusit, para se me dekë.»
11 Kështu që Ebed-Meleku ka shku me ata burra n'pallatin e mbretit, n'nji vend poshtë dhomës së thesarit. Aty kanë marrë do tesha t'vjetra e do copa t'grisuna edhe ia kanë lshu Jeremisë n'pus me konopa.
12 Ebed-Meleku, etiopiani, i ka thanë Jeremisë: «T'lutna, vnoji qeto tesha t'vjetra edhe copa t'grisuna nën sqetulla, që konopat mos me t'lëndu.» Jeremia ka vepru qashtu.
13 Masanej ata e kanë tërhekë Jeremisë me konopa edhe e kanë nxjerrë pi pusit. Jeremia ka mbetë n'oborrin e rojës.
14 Mbreti Zedekia ka çu me e thirrë profetin Jeremia me ardhë te aj, te hyrja e tretë e shpisë së Jehovait. Mbreti i ka thanë Jeremisë: «Du me t'vetë diçka. Mos ma mshef kurgjo.»
15 Jeremia i ka thanë Zedekisë: «Nëse ta thom, ti me siguri ki me m'mbytë. E nëse t'jap naj këshillë, ti s'ki me m'ngu.»
16 Atëherë mbreti Zedekia i asht betu Jeremisë fshehtas: «Pasha Jehovain e gjallë, që na e ka dhanë këtë jetë, unë s'kom me t'mbytë, e as s'kom me t'ia dorëzu atyne burrave që po dojnë me ta marrë jetën.»
17 Atëherë Jeremia i ka thanë Zedekisë: «Qekjo asht qka thotë Jehovai, Zoti i ushtrive, Zoti i Izraelit: ‘Nëse ju dorëzohesh prijësve t'mbretit t'Babilonisë, jeta jote ka me u kursy edhe ky qytet s'ka me u kallë. Ti edhe krejt ata që jetojnë n'shpinë tonde keni me shpëtu.
18 Po nëse s'ju dorëzohesh prijësve t'mbretit t'Babilonisë, ky qytet ka me iu dorëzu kaldeasve, ata kanë me e kallë, edhe ti s'ki me mujtë me shpëtu pi duert e tyne.’»
19 Atëherë mbreti Zedekia i ka thanë Jeremisë: «Po tutna pi judenjve që kanë kalu n'anën e kaldeasve. Se nëse m'ua dorëzojnë atyne, ndoshta kanë me m'trajtu shumë keq.»
20 Po Jeremia i ka thanë: «S'kanë me t'ua dorëzu atyne. T'lutna, nguje zanin e Jehovait edhe qka po t'thom unë. Atëherë ka me t'shku mirë edhe ki me mbetë gjallë.
21 Po nëse nuk pranon me u dorëzu, Jehovai ma ka kallxu qekët sen:
22 Krejt gratë që kanë mbetë n'pallatin e mbretit t'Judës, kanë me i nxjerrë jashtë te prijësit e mbretit t'Babilonisë, edhe ato kanë me thanë:
‘Burrat që ju ke besu, t'kanë mashtru edhe t'kanë mposhtë.
Ata e kanë lonë kamën tonde me t'u fundosë n'lloq.
E tash jonë tërhekë.’
23 Edhe krejt gratë e tua edhe djemtë e tu kanë me i nxjerrë jashtë te kaldeasit. Ti s'ki me mujtë me shpëtu pi duert e tyne, po mbreti i Babilonisë ka me t'kapë, edhe për shkak tand ky qytet ka me u kallë.»
24 Atëherë Zedekia i ka thanë Jeremisë: «Kërkush s'guxon me marrë vesh për krejt qeto sene, që mos me dekë ti.
25 E nëse burrat kryesorë e marrin vesh që unë kom folë me ty, edhe vijnë te ti e t'thojnë: ‘T'lutna, na kallxo qka i ke thanë mbretit. Mos na mshef kurgjo edhe na s'kemi me t'mbytë. Qka t'ka thanë mbreti?’,
26 atëherë ti thuj atyne: ‘Unë i kom kërku mbretit mos me m'kthy prapë n'shpinë e Jonatanit, se aty kisha dekë.’»
27 Mas do kohe, krejt burrat kryesorë kanë ardhë te Jeremia edhe e kanë vetë. Aj ju ka thanë krejt qka e ka urdhnu mbreti me ju thanë. Atëherë ata e kanë lonë rahat, se kërkush s'e ka ni bisedën.
28 Jeremia ka mbetë n'oborrin e rojës deri ditën kur Jerusalemi u pushtu. Edhe kur u pushtu Jerusalemi, aj hala u konë aty.