Ezekiel 38
1 Prap m’erdh ni fjalë pi Jehovait. Ajo thojke:
2 „O bir i njeriut, ktheje ftyrën kah Gogu pi vendi i Magogut, sundimtari kryesor i Meshekut edhe Tubalit, edhe profetizo kundër tij.
3 Thuaj: ‘Qe qka thotë Zoti Sovran Jehova: «Unë jom kundër teje, o Gog, ti sundimtari kryesor i Meshekut edhe Tubalit.
4 Kam me ta ndërru drejtimin, kam me t’vu grepa n’nofullën tane edhe kam me t’nxjerrë jashtë bashkë me krejt ushtrinë tane, me kuaj e kalorës, krejt t’veshun bukur, ni turmë shumë e madhe me mburoja t’mdhaja e t’vogla, krejt me shpata n’dorë.
5 Persia, Etiopia edhe Puti jonë bashkë me ta, krejt me mburoja t’vogla edhe helmeta.
6 Gomeri me krejt trupat e veta, shpija e Togarmës pi veriut ma t’largët bashkë me krejt trupat e veta, po, shumë popuj jonë me ty.
7 Bëhu gati, përgatitu mirë, ti bashkë me krejt ushtritë e tua që jonë mbledhë te ti, edhe ti ki me qenë komandanti i tyne.
8 Mas shumë ditëve kam me e drejtu vëmendjen kah ti. Kah fundi i viteve, ti ki me hi n’atë vend ku populli asht kthy masi shpata ka ba kërdi. Ky popull asht mbledhë pi shumë popuj edhe asht sjellë te malet e Izraelit, që kanë nejtë gjatë t’shkatërrume. Banorët e atij vendi jonë nxjerrë pi popujve edhe tash krejt jetojnë t’sigurt.
9 Ki me u lshu mbi ta si furtunë edhe ki me e mbulu vendin si retë, ti bashkë me krejt trupat e tua edhe me shumë popuj që jonë me ty.»’
10 Qe qka thotë Zoti Sovran Jehova: ‘Atë ditë kanë me t’ardhë mendime n’zemër edhe ki me kurdisë ni plan t’keq.
11 Ki me thanë: «Kam me hi n’atë vend ku vendbanimet s’jonë t’mbrojtuna. Kam me u nisë kundër atyne që jetojnë rahat e t’sigurt. Krejt jetojnë n’vendbanime pa mure, pa shula edhe pa porta.»
12 Qëllimi asht me marrë plaçkë t’madhe edhe me grabitë shumë, me sulmu vendet që kanë qenë t’shkatërrume e ku tash jetojnë njerëz, edhe me sulmu ni popull që asht mbledhë pi shumë popuj, që po mbledh pasuni e prona edhe që jeton n’mes t’tokës.
13 Sheba edhe Dedani, tregtarët e Tarshishit edhe krejt luftëtarët e tij kanë me të vetë: «A po hyn aty me marrë plaçkë t’madhe edhe me grabitë shumë? A i ke mbledhë ushtritë e tua me marrë argjend e ari, me rrëmby pasuni e prona edhe me marrë shumë plaçkë?»’
14 Prandaj, o bir i njeriut, profetizo edhe thuji Gogut: ‘Qe qka thotë Zoti Sovran Jehova: «Atë ditë, kur populli jem Izraeli ka me jetu i sigurt, a s’ki me e ditë ti?
15 Ki me ardhë pi vendi yt, pi veriut ma t’largët, ti bashkë me shumë popuj që jonë me ty, krejt mbi kuaj, ni turmë e madhe, ni ushtri shumë e madhe.
16 Ki me u nisë kundër popullit tem, Izraelit, si retë që e mbulojnë vendin. N’fund t’ditëve kam me t’sjellë kundër vendit tem, që popujt me m’njoftë, kur unë kam me u shenjtëru para syve t’tyne nëpërmjet teje, o Gog.»’
17 Qe qka thotë Zoti Sovran Jehova: ‘A s’je ti aj për t’cilin kam folë moti nëpërmjet shërbëtorëve t’mi, profetëve t’Izraelit, që për shumë vjet kanë profetizu se ti ki me u sjellë kundër tyne?’
18 ‘Atë ditë, ditën kur Gogu ka me hi n’vendin e Izraelit’, thotë Zoti Sovran Jehova, ‘zemërimi jem i madh ka me u ndezë.
19 Me gjithë zellin tem edhe zemërimin tem t’flaktë kam me folë, edhe atë ditë ka me ra ni tërmet i madh n’vendin e Izraelit.
20 Për shkak temin kanë me u dridhë peshqit e detit, zogjtë e qiellit, kafshët e egra t’fushës, krejt zvarranikët që zvarriten për toke edhe krejt njerëzit që jonë n’faqe t’tokës. Malet kanë me u rrëzu, faqet e shkambijve kanë me u shembë edhe çdo mur ka me ra.’
21 ‘Kam me thirrë shpatën kundër tij n’krejt malet e mia’, thotë Zoti Sovran Jehova. ‘Secili ka me e kthy shpatën kundër vllaut t’vet.
22 Kam me ia zbatu dënimin me murtajë edhe me derdhje gjaku. Mbi të, mbi trupat e tij edhe mbi shumë popuj që jonë me të, kam me lshu shi që vërshon, kokrra breshni, zjarr edhe squfur.
23 Edhe pa tjetër kam me e tregu madhështinë teme, kam me u shenjtëru edhe kam me e ba veten t’njohun para syve t’shumë popujve. Edhe ata kanë me e marrë vesh që unë jom Jehova.’