Libri i tret i Musës 10
1 Ma vonë, djemtë e Aronit, Nadabi edhe Abihu, e kanë marrë secili enën e vet për zjarr, kanë qitë zjarr mrena edhe kanë vnu temjan përmi të. Masanej kanë ja nisë me ofru para Jehovait zjarr që s'u konë i lejum, diçka që aj s'ua kish urdhnu.
2 Atëherë pi Jehovait ka dalë zjarr edhe i ka mbytë. Ata kanë dekë para Jehovait.
3 Masanej Moisiu i ka thanë Aronit: «Jehovai ka thanë kështu: ‘Te ata që m'rrijnë afër, ka me u pa që jom i shenjtë, edhe para krejt popullit ka me u madhnu lavdia jeme.’» Aroni s'ka folë kurgjo.
4 Atëherë Moisiu i ka thirr Mishaelin edhe Elzafanin, djemtë e Uzielit, axhës së Aronit, edhe u ka thanë: «Hajdeni këtu, merrni vllaznitë e juve pi vendit të shenjtë edhe çojini jashtë kampit.»
5 Ata kanë ardh edhe i kanë bartë jashtë kampit, me krejt teshat e tyne të gjata, qysh e ka urdhnu Moisiu.
6 Masanej Moisiu i ka thanë Aronit edhe dy djemve të tjerë të tij, Eleazarit edhe Itamarit: «Mos i lini flokët me ju nejt të shprishuna edhe mos i shqyni teshat e juve, që mos me dekë edhe që Zoti mos me u idhnu me krejt popullin. Vllaznitë e juve pi krejt shpia e Izraelit kanë me kajt për ata që Jehovai i ka mbytë me zjarr.
7 Mos u largoni pi hyrjes së tendës së takimit, se përndryshe keni me dekë, sepse jeni të mirosun me vajin e Jehovait.» Ata kanë vepru qysh u ka thanë Moisiu.
8 Masanej Jehovai i ka thanë Aronit:
9 «Ti edhe djemtë e tu, mos pini venë as naj pije tjetër me alkool kur hini në tendën e takimit, që mos me dekë. Ky rregull ka me vlejtë përgjithmonë për krejt brezat e juve.
10 Qashtu keni me dallu atë që asht e shenjtë pi asaj që s'asht e shenjtë, edhe atë që asht e papastër pi asaj që asht e pastër.
11 Edhe qashtu keni me i mësu izraelitët krejt rregullat që Jehovai ua ka dhanë përmes Moisiut.»
12 Masanej Moisiu i ka thanë Aronit, Eleazarit edhe Itamarit, djemve që i kanë mbetë: «Merreni atë që ka mbetë pi kurbanit të drithit, që asht pjesë e kurbaneve që i ofrohen Jehovait me zjarr, edhe hajeni si bukë pa tharm afër altarit, se asht shumë i shenjtë.
13 Duhet me e hanger në nji ven të shenjtë, se ajo asht pjesa pi kurbanet që i ofrohen Jehovait me zjarr, që të takon ty edhe djemve të tu. Qashtu m'u ka urdhnu.
14 Ti, djemtë e tu edhe çikat e tua, duhet me e hanger edhe gjoksin e kurbanit që tundet para Jehovait, edhe kofshën që jepet si pjesë e shenjtë, në nji ven të pastër. Se kjo asht pjesa pi kurbanet e bashkësisë së izraelitëve që ju takon ty edhe djemve të tu.
15 Kofshën që jepet si pjesë e shenjtë edhe gjoksin e kurbanit që tundet, kanë me i pru bashkë me yndyrën e kurbaneve që ofrohen me zjarr, për me e tundë kurbanin andej-knej para Jehovait. Kjo ka me konë përgjithmonë pjesa që ju takon ty edhe djemve të tu, bash qysh e ka urdhnu Jehovai.»
16 Moisiu e ka lypë mirë e mirë cjapin e kurbanit për gjynah, po e ka marrë vesh që e kishin djegë. Atëherë u idhnu me Eleazarin edhe Itamarin, djemtë e Aronit që kanë mbetë, edhe u ka thanë:
17 «Pse s'e keni hanger kurbanin për gjynah në venin e shenjtë? Aj asht shumë i shenjtë edhe ju asht dhanë juve që me e marrë mbi veti fajin e popullit edhe me ba shlyerjen e gjynaheve për ta para Jehovait.
18 Gjaku i tij s'asht çu mrena në venin e shenjtë. Ju është dashtë patjetër me e hanger kurbanin në venin e shenjtë, qysh m'u ka urdhnu.»
19 Aroni i ka thanë Moisiut: «Ata sot i kanë ofru kurbanin e tyne për gjynah edhe kurbanin që digjet krejt para Jehovait, e prapë mu më ka ndodhë kjo. A kish me i pëlqy Jehovait nëse unë sot e kisha hanger kurbanin për gjynah?»
20 Kur Moisiu e ka ni këtë, u pajtu.