Libri i katërt i Musës 4
1 Jehovai i ka thanë Moisiut edhe Aaronit:
2 “Djemtë e Kehatit, që jonë pi djemve të Levit, kanë me u regjistru krejt simas familjeve edhe farefiseve të tyne,
3 krejt ata pi 30 deri 50 vjeç, që jonë në grupin që ka me punu te çadra e takimit.
4 Këto jonë punët që djemtë e Kehatit kanë me i bo në çadrën e takimit. Këto punë kanë të bajnë me sendet ma të shenjta:
5 Kur kampi ka me u nisë, Aaroni edhe djemtë e tij kanë me hi mrena, kanë me e hjek perden ndarëse edhe me e mbulu me të arkën ku jonë pllakat e ligjit.
6 Mbi arkë kanë me qitë nji mbulesë pi lëkurave të fokave, mbi të kanë me shtri nji cohë të kaltër edhe kanë me ia vnu shufrat për me e bartë.
7 Edhe mbi tavolinën e bukëve që paraqiten para Zotit kanë me shtri nji cohë të kaltër. Përmi të kanë me i vnu enët e thella, gotat, tasat edhe ibrikat për ofertën e pijes. Buka që ofrohet rregullisht ka me metë në tavolinë.
8 Krejt këto kanë me i mbulu me nji cohë të kuqe të thellë, kanë me qitë përmi të nji mbulesë pi lëkurave të fokave edhe kanë me ia vnu shufrat për me e bartë.
9 Masanej kanë me marrë nji cohë të kaltër edhe me e mbulu shandanin që jep dritë, bashkë me llambat e tij, darët për fitilat, enët e zjarrit edhe krejt enët e vajit që përdoren për shandanin.
10 Shandanin bashkë me krejt pajisjet e tij kanë me e pshtjellë me nji mbulesë pi lëkurave të fokave edhe kanë me e vnu mbi nji mbajtëse për me e bartë.
11 Edhe mbi altarin e artë kanë me shtri nji cohë të kaltër, kanë me qitë përmi të nji mbulesë pi lëkurave të fokave edhe kanë me ia vnu shufrat për me e bartë.
12 Masanej kanë me i marrë krejt sendet që i përdorin rregullisht për shërbim në vendin e shenjtë, kanë me i pshtjellë me nji cohë të kaltër, me i mbulu me nji mbulesë pi lëkurave të fokave edhe me i vnu mbi nji mbajtëse për me i bartë.
13 Kanë me e hjek hinin pi altari edhe kanë me shtri mbi të nji cohë pi leshi ngjyrë vjollcë të kuqërremtë.
14 Mbi të kanë me i vnu krejt pajisjet që i përdorin kur shërbejnë te altari: enët e zjarrit, pirunat, lopatat, tasat edhe krejt sendet që i takojnë altarit. Masanej kanë me shtri përmi to nji mbulesë pi lëkurave të fokave edhe kanë me ia vnu shufrat për me e bartë.
15 Kur kampi ka me u nisë, Aaroni edhe djemtë e tij kanë me e pasë kry mbulimin e vendit të shenjtë edhe të krejt sendeve që i takojnë atij. Masanej djemtë e Kehatit kanë me hi me i bartë krejt këto. Ama ata s’guxojnë me i prekë sendet e shenjta, se përndryshe kanë me dekë. Qito jonë punët që djemtë e Kehatit e kanë për detyrë me i bo në lidhje me çadrën e takimit.
16 Eleazari, djali i priftit Aaron, asht përgjegjës për vajin e llambave, temjanin me erë të mirë, ofertën e rregullt të drithit edhe vajin për me ly. Aj asht përgjegjës për krejt çadrën e shenjtë edhe për gjithçka që gjindet mrena saj, për vendin e shenjtë edhe për krejt sendet që i takojnë atij.”
17 Masanej Jehovai i ka thanë prapë Moisiut edhe Aaronit:
18 “Keni kujdes që fisi i familjeve të Kehatit mos me u zhdukë pi mesi i levitëve.
19 Bani qeshtu për ta, që me metë gjallë e mos me dekë kur i afrohen sendeve ma të shenjta. Aaroni edhe djemtë e tij kanë me hi mrena edhe secilit kanë me ia caktu qka ka me bo edhe qka ka me bartë.
20 Kehatitët s’guxojnë me hi mrena e me i pa sendet e shenjta, as veç për nji moment, se përndryshe kanë me dekë.”
21 Masanej Jehovai i ka thanë Moisiut:
22 “Djemtë e Gershonit kanë me u regjistru krejt simas farefiseve edhe familjeve të tyne.
23 Regjistroji krejt ata pi 30 deri 50 vjeç, që jonë në grupin që ka me shërby në çadrën e takimit.
24 Familjet e Gershonitëve e kanë për detyrë me i bartë këto sene:
25 Kanë me i bartë pëlhurat e çadrës së shenjtë, çadrën e takimit, mbulesën e saj edhe mbulesën pi lëkurave të fokave që asht përmi të, perden te hymja e çadrës së takimit,
26 perdet e oborrit, perden te hymja e oborrit që e rrethon çadrën e shenjtë edhe altarin, litarët e çadrës bashkë me krejt pajisjet e tyne, edhe gjithçka tjetër që duhet për shërbimin aty. Kjo asht puna e tyne.
27 Aaroni edhe djemtë e tij kanë me e mbikëqyrë krejt shërbimin e Gershonitëve edhe bartjen e krejt barrëve të tyne. Ju keni me ua lanë atyne përgjegjësinë për krejt këto barrë.
28 Ky asht shërbimi që familjet e Gershonitëve kanë me e bo në çadrën e takimit. Për me i mbikëqyrë këto punë asht përgjegjës Ithamari, djali i priftit Aaron.
29 Tash, sa për djemtë e Merarit, regjistroji simas familjeve edhe farefiseve të tyne.
30 Regjistroji krejt ata pi 30 deri 50 vjeç, që jonë në grupin që ka me shërby te çadra e takimit.
31 Për shërbimin e tyne te çadra e takimit, ata e kanë për detyrë me i bartë këto sene: kornizat e çadrës së shenjtë, shufrat e saj, shtyllat e saj, bazat ku futen ato,
32 shtyllat e oborrit përreth, bazat ku futen ato, kunjat e çadrës, litarët e saj bashkë me krejt pajisjet edhe gjithçka që lidhet me këtë shërbim. Secilit caktojani me emër qka ka me bartë pi këtyne pajisjeve.
33 Qito jonë punët që familjet e djemve të Merarit kanë me i bo te çadra e takimit, nën drejtimin e Ithamarit, djalit të priftit Aaron.”
34 Masanej Moisiu, Aaroni edhe krerët e bashkësisë i kanë regjistru djemtë e Kehatit simas familjeve edhe farefiseve të tyne,
35 krejt ata pi 30 deri 50 vjeç, që jonë në grupin që ka me shërby te çadra e takimit.
36 Gjithsej i kanë regjistru 2750 veta simas familjeve të tyne.
37 Qita jonë ata që u regjistrun pi familjet e Kehatitëve, krejt ata që shërbejshin te çadra e takimit. Moisiu edhe Aaroni i kanë regjistru qysh i ka urdhnu Jehovai përmes Moisiut.
38 Edhe djemtë e Gershonit u regjistrun simas familjeve edhe farefiseve të tyne,
39 krejt ata pi 30 deri 50 vjeç, që jonë në grupin që ka me shërby te çadra e takimit.
40 Gjithsej i kanë regjistru 2630 veta simas familjeve edhe farefiseve të tyne.
41 Qita jonë krejt ata pi familjet e djemve të Gershonit që u regjistrun, ata që shërbejshin te çadra e takimit. Moisiu edhe Aaroni i kanë regjistru simas urdhnit të Jehovait.
42 Edhe djemtë e Merarit u regjistrun simas familjeve edhe farefiseve të tyne,
43 krejt ata pi 30 deri 50 vjeç, që jonë në grupin që ka me shërby te çadra e takimit.
44 Gjithsej i kanë regjistru 3200 veta simas familjeve të tyne.
45 Qita jonë ata pi familjet e djemve të Merarit që Moisiu edhe Aaroni i kanë regjistru, qysh i ka urdhnu Jehovai përmes Moisiut.
46 Moisiu, Aaroni edhe krerët e Izraelit i kanë regjistru krejt këta levitë simas familjeve edhe farefiseve të tyne.
47 Ata ishin pi 30 deri 50 vjeç edhe krejt e kishin për detyrë me shërby edhe me bartë barrë në lidhje me çadrën e takimit.
48 Gjithsej u regjistrun 8580 veta.
49 Ata u regjistrun qysh e ka urdhnu Jehovai përmes Moisiut. Secilit ju caktu puna që ka me e bo edhe barra që ka me e bartë. Regjistrimi i tyne u bo tamam qysh Jehovai e kishte urdhnu Moisiun.