Libri i katërt i Musës 8
1 Jehovai i tha Musës:
2 “Fol me Aronin edhe thuji: ‘Kur t'i ndezësh llambat, të shtatë llambat duhet me e ndriçu venin përpara shandanit.’”
3 Aroni ka vepru qashtu: i ka ndez llambat që me e ndriçu venin përpara shandanit, qysh e kish urdhnu Jehovai Musën.
4 Shandani u konë i punum kështu: pi boshti e deri te lulet, krejt u konë i punum pi ari i rrahun. U konë i marum qysh ia kish kallxu Jehovai Musës në nji vegim.
5 Jehovai i tha prapë Musës:
6 “Merri levitët pi mesi i izraelitëve edhe pastroji.
7 Kështu ke me i pastru: Spërkati me ujë që pastron pi gjynahet. Ata duhet me e rru krejt trupin me brisk, me i la teshat e veta edhe me e pastru veten.
8 Masanej le ta marrin nji dem të ri, bashkë me kurbanin e drithit që i takon, pi mielli i mirë i përzimë me vaj. E ti merre edhe nji dem tjetër të ri si kurban për gjynah.
9 Silli levitët përpara tendës së takimit edhe mblidhe krejt bashkësinë e izraelitëve.
10 Kur t'i sjellësh levitët para Jehovait, izraelitët duhet me i vnu duert mbi ta.
11 Aroni ka me ia ofru Jehovait levitët si kurban që tundet, pi ana e izraelitëve. Ata kanë me e kry shërbimin për Jehovain.
12 Masanej levitët duhet me i vnu duert mbi kryt e demave. Njani ka me iu ofru Jehovait si kurban për gjynah, e tjetri si kurban që digjet krejt, për me bo shlyerjen e gjynaheve për levitët.
13 Ti ke me i qit levitët përpara Aronit edhe djemve të tij, edhe ke me ia ofru Jehovait si kurban që tundet.
14 Ndaji levitët pi izraelitët. Levitët kanë me m'taku mu.
15 Mas kësaj, levitët kanë me hy me shërby te tenda e takimit. Kështu ke me i pastru edhe me i ofru si kurban që tundet.
16 Se ata m'jonë dhanë mu pi mesi i izraelitëve. Unë po i marr për veti në vend të krejt të parëlindunve të izraelitëve.
17 Se çdo i parëlindun i izraelitëve më takon mu, si njeri, si kafshë. Atë ditë kur i kom vra krejt të parëlindunit në Egjipt, i kom shenjtëru ata për veti.
18 Unë kom me i marrë levitët në vend të krejt të parëlindunve të izraelitëve.
19 Unë kom me ia dhanë levitët Aronit edhe djemve të tij, si të dhanë pi mesi i izraelitëve. Ata kanë me shërby te tenda e takimit për izraelitët edhe kanë me bo shlyerjen e gjynaheve për ta, që izraelitët mos me iu afru vendit të shenjtë e mos me i goditë naj fatkeqësi për shkak të kësaj.”
20 Musa, Aroni edhe krejt bashkësia e izraelitëve kanë vepru qashtu me levitët. Izraelitët i kanë bo krejt ato që Jehovai e kish urdhnu Musën me ua bo levitëve.
21 Levitët e kanë pastru veten edhe i kanë la teshat e veta. Masanej Aroni ia ka ofru Jehovait si kurban që tundet. Pastaj Aroni ka bo shlyerjen e gjynaheve për ta, për me i pastru.
22 Mas kësaj, levitët kanë hy me e kry shërbimin te tenda e takimit, nën mbikëqyrjen e Aronit edhe djemve të tij. Krejt qka u bo me levitët, u bo qysh e kish urdhnu Jehovai Musën.
23 Masanej Jehovai i tha Musës:
24 “Për levitët vlen kjo: Kur nji burrë i mbush 25 vjet, ka me iu bashku grupit që shërben te tenda e takimit.
25 Kur t'i mbush 50 vjet, ka me u largu pi grupi i shërbimit edhe s'ka me shërby ma.
26 Aj munet me ju ndihmu vllaznive të vet që kujdesen për detyrat te tenda e takimit, po vet s'ka me e kry shërbimin aty. Kështu ke me vepru me levitët edhe me detyrat e tyne.”