Libri i pest i Musës 13
1 Nëse në mesin tand del nji pejgamber a dikush që kallxon pi andrrave qka ka me ndodhë, edhe të paralajmëron nji shenjë a nji mrekulli,
2 edhe ajo shenjë a mrekulli ndodh përnime, qysh ta ka thanë aj, e aj të thotë: «Hajde, të shkojmë mas zotave tjerë», zotave që ti s’i ke njoftë, «edhe t’u shërbejmë atyne»,
3 atëher mos e ngo qat pejgamber a qat njeri që sheh andrra. Se Jehova, Zoti yt, po të sprovon me pa a e don Jehovën, Zotin tand, me krejt zemrën edhe me krejt shpirtin tand.
4 Ju duhet me shku mas Jehovës, Zotit tuej, edhe me pasë tutë e respekt për të. Mbajini urdhnat e tij edhe ngojani zanin. Atij duhet me i shërby edhe me u mbajt fort mas tij.
5 Po ai pejgamber a ai që sheh andrra duhet me u dënu me vdekje, se i ka thirrë njerzit me i dalë kundër Jehovës, Zotit tuej, që ju ka nxjerrë pi Egjiptit edhe ju ka liru pi robnisë. Aj ka dashtë me ju largu pi rruga që Jehova, Zoti juej, ju ka thanë me e ndjekë. Hekeni të keqen pi mesit tuej.
6 Nëse vllau yt, djali i nanës tane, a djali yt, çika jote, gruja jote e dashtun a shoku yt ma i ngushtë mundohet tinza me të shty me shku mas zotave tjerë edhe të thotë: «Hajde, t’u shërbejmë zotave tjerë», zotave që as ti e as të parët e tu s’i keni njoftë,
7 zotave të popujve që jetojnë përreth teje, qofshin afër a larg, pi njanit skaj të vendit deri te skaji tjetër,
8 atëher mos u jep mas fjalëve të tij edhe mos e ngo. Mos të vjen gjynah për të. Mos ki dhimt për të edhe mos e mbroj.
9 Përkundrazi, patjetër duhet me e vra. Ti duhet me kon i pari që e çon dorën kundër tij për me e vra, e mas teje duhet me marrë pjesë krejt populli.
10 Gjuje me gurë deri sa të dekë, se aj ka tentu me të largu pi Jehovës, Zotit tand, që të ka nxjerrë pi robnisë në Egjipt.
11 Krejt Izraeli ka me ni për këtë punë edhe ka me u tutë, e kurr ma s’ka me u bo nji e keqe e tillë në mesin tand.
12 Nëse në njanin pi qyteteve që Jehova, Zoti yt, po të len me i marrë, nin për nji punë të tillë,
13 që do burra që s’vlejnë kurgjo kanë dalë pi mesit tuej edhe po mundohen me i largu banorët e qytetit të vet pi Zotit, tu ju thanë: «Hajdeni, t’u shërbejmë zotave tjerë», zotave që ti s’i ke njoftë,
14 atëher duhet me e hetu mirë këtë punë, me pyet gjithkah edhe me u siguru saktë qka ka ndodhë. Nëse del përnime që nji punë kaq e keqe e e neveritshme u bo në mesin tuej,
15 atëher patjetër duhet me i vra me shpatë banorët e atij qyteti. Duhet me e shkatërru krejt qytetin me shpatë, bashkë me gjithçka që ka mrena, edhe bagëtinë, pa lonë kurgjo.
16 Masanej mblidhe krejt plaçkën në mes të sheshit të qytetit edhe jepi flakë qytetit. Krejt ajo plaçkë duhet me u djegë si kurban i plotë për Jehovën, Zotin tand. Qyteti ka me metë gërmadhë përgjithmonë edhe kurr ma s’ka me u ndërtu.
17 Mos merr kurgjo pi atyne seneve që jon caktu me u shkatërru, që Jehova me e lonë zemrimin e tij të madh, me pasë dhimt e gjynah për ty edhe me të shumzu, qysh u asht betu të parëve tu.
18 Se ti duhet me e ngu Jehovën, Zotin tand, edhe me i mbajtë krejt urdhnat e tij që po t’i jap sot. Qashtu e bon atë që asht e drejtë në sytë e Jehovës, Zotit tand.