Libri i pest i Musës 28
1 Nëse ti ia ngon me t'vërtetë zanin Jehovës, Zotit tand, edhe ki kujdes me i mbajtë krejt urdhnat e tij që po t'i jap sot, atëherë Jehovai, Zoti yt, ka me t'çu nalt mbi krejt popujt tjerë t'tokës.
2 Krejt qeto bekime kanë me ardhë mbi ty edhe kanë me t'zanë, nëse ti vazhdimisht ia ngon zanin Jehovës, Zotit tand:
3 Jehovai ka me t'beku në qytet edhe ka me t'beku në arë.
4 T'bekum kanë me konë fëmijët e tu, bereqeti i tokës tane edhe të vegjlit e bagëtive tua, viçat e lopëve edhe qengjat e deleve tua.
5 E bekume ka me konë shporta jote edhe ena ku e ngjesh brumin.
6 I bekuem ke me konë kur hyn mrena, edhe i bekuem ke me konë kur del jashtë.
7 Jehovai ka me bo që armiqtë e tu që çohen kundër teje me u mundë para teje. Ata kanë me t'sulmu pi nji anë, po kanë me ikë para teje në shtatë anë t'ndryshme.
8 Jehovai ka me urdhnu që bekimi me ardhë mbi depot tua edhe mbi krejt punët që i bon. Aj patjetër ka me t'beku në vendin që Jehovai, Zoti yt, po ta jep.
9 Jehovai ka me t'bo nji popull t'shenjtë për veti, qysh t'ka dhanë besën, nëse ti i mban urdhnat e Jehovës, Zotit tand, edhe ecën rrugëve t'tij.
10 Krejt popujt e tokës kanë me e pa që ti e mban emnin e Jehovës, edhe kanë me pasë frikë pi teje.
11 Jehovai ka me t'dhanë fëmijë me bollëk, bagëti me bollëk edhe shumë bereqet pi toka jote, në vendin që ka me ta dhanë, qysh u ka dhanë besën t'parëve tu.
12 Jehovai ka me ta hapë depon e vet t'mirë, qiellin, që me lshu shi mbi tokën tane në kohën e duhun edhe me i beku krejt punët që i bon. Ti ke me u dhanë borxh shumë popujve, po vetë s'ka me t'u dashtë me marrë borxh pi kërkujt.
13 Jehovai ka me t'bo krye e jo bisht. Ti ke me konë nalt e jo poshtë, nëse gjithmonë i ngon urdhnat e Jehovës, Zotit tand, që po t'i jap sot, edhe ki kujdes me i mbajtë e me vepru sipas tyne.
14 Mos u largo as djathtas as majtas pi krejt urdhnave që po t'i jap sot, edhe mos shko mas zotave tjerë për me ju shërby atyne.
15 Po nëse ti s'ia ngon zanin Jehovës, Zotit tand, edhe nuk i mban me kujdes krejt urdhnat e rregullat e tij që po t'i jap sot, atëherë krejt qeto mallkime kanë me ardhë mbi ty edhe kanë me t'zanë:
16 I mallkum ke me konë në qytet edhe i mallkum ke me konë në arë.
17 E mallkume ka me konë shporta jote edhe ena ku e ngjesh brumin.
18 T'mallkum kanë me konë fëmijët e tu, bereqeti i tokës tane edhe viçat e lopëve e qengjat e deleve tua.
19 I mallkum ke me konë kur hyn mrena, edhe i mallkum ke me konë kur del jashtë.
20 Jehovai ka me lshu mbi ty mallkime, hutim edhe dënim në krejt punët që i bon, derisa t'shuhesh krejt e t'zhdukesh shpejt, se ke vepru keq edhe m'ke lonë mu.
21 Jehovai ka me bo që murtaja me t'u ngjitë e mos me t'u nda, derisa me t'zhdukë pi vendi që ke me e marrë për veti.
22 Jehovai ka me t'dënu me tuberkuloz, me ethe t'nalta, me pezmatime, me nxehtësi t'madhe pi ethet, me shpatë, me ndryshk t'drithit edhe me myk. Qeto kanë me t'ndjekë derisa t'vdesësh.
23 Qielli mbi krye tand ka me u bo si bakër, e toka nën kambët tua si hekur.
24 Jehovai ka me bo që në vend t'shiut, mbi tokën tane me ra zall e pluhun pi qielli, derisa t'shuhesh krejt.
25 Jehovai ka me bo që armiqtë e tu me t'mundë. Ti ke me i sulmu pi nji anë, po ke me ikë para tyne në shtatë anë t'ndryshme. Krejt mbretnitë e tokës kanë me u tmerru kur t'shohin qka t'ka ndodhë.
26 Trupat tu t'vdekun kanë me u bo ushqim për krejt zogjtë e qiellit edhe për krejt kafshët e tokës, e s'ka me pasë kërkush me i trembë e me i largu.
27 Jehovai ka me t'dënu me çibanat e Egjiptit, me hemorroide, me ekzemë edhe me puçrra në lëkurë, që s'kanë me t'u shëru.
28 Jehovai ka me t'dënu me çmenduni, me verbni edhe me hutim.
29 Në pikë t'ditës ke me prekë andej-këndej si nji i verbtë në terr, edhe kurgjo pi asaj që e bon s'ka me t'ecë mbarë. Gjithmonë kanë me t'mashtru e me t'plaçkitë, e s'ka me pasë kërkush me t'shpëtu.
30 Ti ke me u feju me nji grue, po nji tjetër ka me e dhunu. Ke me ndërtu nji shpi, po s'ke me banu në to. Ke me mbjellë nji vresht, po s'ke me mujtë me e shfrytëzu.
31 Kaun tand kanë me ta pre para syve tu, po ti s'ke me hangër kurgjo pi mishit t'tij. Gomarin kanë me ta vjedhë para syve tu, e s'kanë me ta kthy. Delet tua kanë me ua dhanë armiqve tu, e s'ka me pasë kërkush me t'shpëtu.
32 Djemtë edhe çikat tua kanë me ia dhanë nji populli tjetër para syve tu. Ti vazhdimisht ke me pasë mall për ta, po s'ke me pasë kurrfarë fuqie me bo diçka.
33 Bereqetin e tokës tane edhe krejt qka prodhon ti, ka me ta hangër nji popull që s'e njeh. Edhe vazhdimisht kanë me t'mashtru e me t'shtypë.
34 Ke me u çmendë pi krejt atyne seneve që kanë me t'i pa sytë.
35 Jehovai ka me t'dënu me çibana t'dhimshëm që s'shërohen, në gjunjë edhe në kofshë, pi kresë deri te shputat e kambëve.
36 Jehovai ka me t'çu ty edhe mbretin që ti e vendos mbi veti te nji popull që s'e ke njoftë as ti as t'parët tu. Atje ke me ju shërby zotave tjerë, zotave pi druni e pi guri.
37 Te krejt popujt ku Jehovai ka me t'çu, kanë me u tmerru kur t'shohin qka t'ka ndodhë. Kanë me t'përbuzë edhe kanë me u tallë me ty.
38 Ke me qitë shumë farë në arë, po pak ke me mbledhë, se karkalecat kanë me ta hangër.
39 Ke me mbjellë vreshta edhe ke me punu në to, po s'ke me pi venë e as s'ke me mbledhë kurgjo, se krimbat kanë me ta hangër.
40 Ke me pasë drunj t'ullinit në krejt vendin tand, po s'ke me mujtë me u ly me vaj, se ullinjtë kanë me t'ra pi drunit.
41 Ke me pasë djem e çika, po s'kanë me t'mbetë ty, se kanë me i marrë robër.
42 Tufa t'mëdha insektesh kanë me i sulmu krejt drunjtë e tu edhe bereqetin e tokës tane.
43 I huji që banon mes jush ka me hyp gjithnjë e ma nalt se ti, kurse ti ke me ra gjithnjë e ma poshtë.
44 Aj ka me t'dhanë ty borxh, po ti s'ke me i dhanë atij borxh. Aj ka me u bo krye, e ti bisht.
45 Krejt qeto mallkime patjetër kanë me ardhë mbi ty, kanë me t'ndjekë edhe kanë me t'zanë, derisa t'shuhesh krejt. Se ti s'ia ke ngu zanin Jehovës, Zotit tand, edhe s'i ke mbajtë urdhnat e rregullat që t'i ka dhanë.
46 Qeto mallkime kanë me ardhë mbi ty edhe kanë me mbetë si nji shenjë e si nji paralajmërim për ty edhe për pasardhësit e tu përgjithmonë,
47 se ti s'i ke shërby Jehovës, Zotit tand, me gëzim e me zemër t'gëzume, edhe pse ke pasë bollëk pi krejt senve.
48 Jehovai ka me t'i çu armiqtë e tu, e ti ke me ju shërby atyne, tu konë i untë, i etshëm, me pak tesha edhe pa senet që t'duhen. Aj ka me ta vu nji zgjedhë t'hekurt në qafë, derisa me t'zhdukë krejt.
49 Jehovai ka me sjellë kundër teje nji popull pi shumë larg, pi skajit t'tokës. Aj ka me t'u lshu mbi ty si shqiponja. Ka me konë nji popull që s'ia kupton gjuhën,
50 nji popull me pamje t'egër, që s'ka respekt për pleqtë edhe s'i vjen gjynah për t'rinjtë.
51 Ata kanë me ta hangër krejt të vegjlit e bagëtive edhe bereqetin e tokës tane, derisa t'shuhesh krejt. S'kanë me t'lonë as drithë, as venë t're, as vaj, as viça e as qengja, derisa me t'zhdukë.
52 Ata kanë me t'rrethu edhe kanë me t'mbyllë mrena në krejt qytetet e tua, në krejt vendin tand, derisa t'rrëzohen muret e nalta e t'forta ku ti e ke pasë besimin. Po, ata patjetër kanë me t'rrethu në krejt qytetet e tua, në krejt vendin që Jehovai, Zoti yt, ta ka dhanë.
53 Rrethimi ka me konë aq i randë, edhe armiku yt ka me t'shti në aq shumë zor, sa ti ke me i hangër fëmijët e tu, mishin e djemve edhe t'çikave tua që Jehovai, Zoti yt, t'i ka dhanë.
54 Edhe burrit ma t'butë e ma t'ndjeshëm mes jush s'ka me i ardhë gjynah as për vllaun e vet, as për gruen e vet që e don, e as për djemtë që i kanë mbetë.
55 Aj s'ka me ju dhanë atyne kurgjo pi mishit t'djemve t'vet që ka me e hangër, se s'ka me i mbetë kurgjo tjetër, aq i randë ka me konë rrethimi edhe aq shumë ka me i shtypë armiku qytetet e tua.
56 Edhe grueja ma e butë e ma e ndjeshme mes jush, që u konë aq e përkdhelun sa as në mend s'i ka shku me e qitë kambën në tokë, s'ka me pasë dhimt as për burrin e vet që e don, as për djalin e as për çikën e vet,
57 as për placentën që i del mes kambëve mas lindjes, e as për djemtë që i lind. Ajo ka me i hangër fshehtas, aq i randë ka me konë rrethimi edhe aq shumë ka me i shtypë armiku qytetet e tua.
58 Nëse nuk i mban me kujdes krejt fjalët e qetij ligji që jonë t'shkrume në qet libër, edhe nëse s'ke respekt e frikë për qet emën t'madh e që t'ban me pasë nderim t'thellë, emnin e Jehovës, Zotit tand,
59 atëherë Jehovai ka me t'dënu ty edhe pasardhësit e tu me fatkeqësi shumë t'randa, me fatkeqësi t'mëdha që zgjasin shumë, edhe me sëmundje t'kqija që zgjasin gjatë.
60 Aj ka me i sjellë prapë mbi ty krejt sëmundjet e Egjiptit, pi t'cilave ti gjithmonë ke pasë frikë, edhe ato patjetër kanë me t'u ngjitë e s'kanë me t'u nda.
61 Jehovai ka me sjellë mbi ty edhe krejt sëmundjet e fatkeqësitë që s'jonë t'shkrume në librin e qetij ligji, derisa t'shuhesh krejt.
62 Edhe pse jeni bo aq shumë sa yjet në qiell, veç shumë pak pi jush kanë me mbetë, se ti s'ia ke ngu zanin Jehovës, Zotit tand.
63 Edhe qysh Jehovai u gëzu kur t'ka bo mirë edhe t'ka shtu në numër, njisoj Jehovai ka me u gëzu edhe kur ka me t'zhdukë e me t'shu krejt. Kanë me t'nxjerrë me zor pi vendit që tash po e merr për veti.
64 Jehovai ka me t'shpërnda mes krejt popujve, pi njanit skaj t'tokës deri te skaji tjetër. Atje ke me u detyru me ju shërby zotave pi druni e pi guri, që s'i ke njoftë as ti as t'parët tu.
65 Mes atyne popujve s'ke me gjetë qetësi e as nji vend ku me i pushu kambët. Përkundrazi, Jehovai ka me ta mbushë zemrën me frikë, sytë kanë me t'u dobësu edhe ke me konë i dëshpërum.
66 Jeta jote ka me konë në rrezik t'madh, edhe ti ke me pasë frikë ditë e natë. S'ke me konë i sigurt a ke me mbetë gjallë.
67 Pi frika që e nin në zemër edhe pi krejt qka kanë me t'i pa sytë, në mëngjes ke me thanë: ‘Ah, veç me u bo mbramje!’, e në mbramje: ‘Ah, veç me u bo mëngjes!’
68 Edhe Jehovai patjetër ka me t'kthy me anije në Egjipt, nëpër atë rrugë për t'cilën t'kam thanë: ‘Kurrë ma s'ke me e pa.’ Atje keni me u detyru me ua shitë veten armiqve tu si robër e robnesha, po s'ka me pasë kërkush me ju ble.”