Josiu 3
1 Josiu u çu herët n'sabah edhe bashkë me krejt izraelitët u nis pi Shitimi për te Jordani. Aty kanë bujt para se me kalu lumin.
2 Mbas tri dite, përgjegjësit kanë shku nëpër krejt kampin
3 edhe i kanë thanë popullit: «Sapo t'i shihni priftat levitë tu e bartë arkën e besëlidhjes së Jehovait, Zotit tuaj, nisuni edhe shkoni mas saj.
4 Po mbajeni nji largësi rreth 2 000 bërryla edhe mos iu afroni ma shumë. Kështu keni me e ditë kah duhet me shku, se asnjiherë s'keni kalu asaj rruge.»
5 Josiu i ka thanë popullit: «Bani veten t'shejtë, se nesër Jehovai ka me ba sene t'mdhaja mes jush.»
6 Masanej Josiu u ka thanë priftave: «Merreni arkën e besëlidhjes edhe barteni përpara popullit.» Ata e kanë marrë arkën e besëlidhjes edhe kanë ecë përpara popullit.
7 Masanej Jehovai i ka thanë Josiut: «Pi sotit kam me ba që krejt izraelitët me t'respektu, që ta dinë se, qysh e kom ndihmu Moisiun, ashtu kam me t'ndihmu edhe ty.
8 Priftave që e bartin arkën e besëlidhjes ki me u thanë kështu: ‘Sapo t'arrini te buza e ujit, naluni edhe rrini aty n'Jordan.’»
9 Josiu i ka thirrë izraelitët: «Ejani ktu edhe ngojini fjalët e Jehovait, Zotit tuaj.»
10 Masanej Josiu u ka thanë: «Pi kësaj keni me e ditë që nji Zot i gjallë asht mes jush edhe që aj ka me i përzanë pa tjetër para jush kananitët, hititët, hivitët, perizitët, girgashitët, amoritët edhe jebusitët:
11 Arka e besëlidhjes së Zotit t'krejt tokës ka me shku përpara jush n'Jordan.
12 Zgjedhini dymbëdhjetë burra, pi nji burrë pi secilit fis t'Izraelit.
13 Sapo tabanat e kambëve t'priftave që e bartin arkën e besëlidhjes së Jehovait, Zotit t'krejt tokës, ta prekin ujin, uji i Jordanit që vjen pi nalt ka me u nalë edhe ka me u grumbullu si nji digë.»
14 Kur populli e ka lanë kampin për me kalu Jordanin, priftat që e kanë bartë arkën e besëlidhjes kanë shku përpara.
15 (Jordani i vërshon brigjet gjatë krejt kohës t'korrjes.) Sapo priftat që e kanë bartë arkën kanë mbërri te bregu i Jordanit edhe i kanë shti kambët n'ujë,
16 uji që ka ardhë pi nalt asht nalë. Shumë larg, te Adami, qyteti afër Zaretanit, uji asht grumbullu si nji digë. Kurse uji që ka rrjedhë teposhtë, kah Deti i Arabës (Deti i Kripur), ka rrjedhë tutje. Kështu lumi asht nalë edhe populli ka kalu n'anën tjetër, përballë Jerikos.
17 Priftat që e kanë bartë arkën e besëlidhjes së Jehovait kanë nejt n'mes t'Jordanit, n'vend t'thatë. Ndërkohë, krejt izraelitët kanë kalu me kamë t'thata, derisa krejt populli e ka kalu Jordanin.