Isaia 41
1 „M'ndëgjoni në heshtje, ju ishuj. Popujt le t'i mbledhin forcat e veta. Le t'afrohen e masanej le t'flasin. Le t'mblidhemi për gjyq.
2 Kush e ka bo nji njeri me ardhë pi lindjes edhe e ka thirrë me drejtësi te kambët e veta, me ia dorëzu popujt edhe me i bo mbretërit me iu nënshtru? Kush po i bon ata pluhun para shpatës së tij, si kashtë e thatë që e merr era para harkut të tij?
3 Aj i ndjek ata edhe vazhdon pa pengesa nëpër rrugë ku kamba e tij s'ka shkelë kurrë.
4 Kush e ka bo krejt këtë, kush i ka thirrë brezat njanin mas tjetrit qysh pi fillimit? Unë, Jehovai, jom i pari, edhe me ata që vijnë t'fundit, prapë jom i njejti.“
5 Ishujt e kanë pa këtë edhe i ka kapë frika. Skajet e tokës kanë nisë me u dridhë. Ata po afrohen edhe po dalin përpara.
6 Njani e ndihmon tjetrin edhe i thotë vllaut të vet: „Bohu i fortë.“
7 Mjeshtri i jep zemër atij që e punon metalin. Aj që e rrafshon me çekan të farkëtarit, i jep zemër atij që i mëshon kudhrës. Për metalin që po bashkohet, aj thotë: „Asht mirë.“ Masanej e ngulin me gozhda, që mos me u rrëzu.
8 „Po ti, o Izrael, je shërbëtori jem, ti, o Jakob, që t'kam zgjedhë, ti, pasardhës i mikut tem Abraham,
9 ty që t'kam marrë pi skajeve të tokës, ty që t'kam thirrë pi vendeve ma të largëta t'saj. T'kam thanë: ‚Ti je shërbëtori jem. T'kam zgjedhë, s'të kam hedhë poshtë.
10 Mos u tut, se unë jom me ty. Mos u frikëso, se unë jom Zoti yt. Unë kam me të forcu, po, kam me të ndihmu. Kam me të majtë fort me dorën tem të djathtë të drejtësisë.‘
11 Shih! Krejt ata që janë mbushë me inat kundër teje kanë me u turpëru e kanë me u poshtëru. Ata që luftojnë kundër teje kanë me u shkatërru e kanë me hupë.
12 Ti ke me i kërku burrat që luftojnë kundër teje, po s'ke me i gjetë. Ata që t'luftojnë kanë me u bo sikur mos me ekzistu hiq, kanë me u bo kurgjo.
13 Se unë, Jehovai, Zoti yt, po ta kapi dorën e djathtë, unë që po t'thom: ‚Mos u tut. Kam me t'ndihmu.‘
14 Mos u tut, o Jakob, ti krimb i vogël, unë kam me t'ndihmu, o popull i Izraelit“, thotë Jehovai, aj që t'ka ble prapë, i Shenjti i Izraelit.
15 „Shih! Unë t'kam bo si nji sajë për me shi drithin, nji mjet të ri për shirje, me dhambë që prejnë pi dy anëve. Ti ke me i shkelë e me i blu malet edhe ke me i bo kodrat si byk.
16 Ti ke me i shoshitë edhe era ka me i marrë me veti. Stuhia ka me i shpërnda. Ti ke me u gëzu për Jehovain edhe ke me folë me krenari për të Shenjtin e Izraelit.“
17 „Ata që janë në hall edhe të varfnit po kërkojnë ujë, po s'ka. Gjuha u asht tha pi etjes. Unë, Jehovai, kam me iu përgjigjë. Unë, Zoti i Izraelit, s'kam me i braktisë.
18 Nëpër kodrat e zhveshuna kam me bo që me rrjedhë lumenj edhe nëpër lugina kam me bo që me shpërthy burimet. Unë kam me e kthy shkretinën në nji pellg me kallama edhe tokën pa ujë në burime uji.
19 Në shkretinë kam me mbjellë kedra, akacie, mirta edhe pisha. Në fushën e shkretë kam me mbjellë dëllinja bashkë me frashna edhe selvia,
20 që krejt me pa e me kuptu, me i kushtu vëmendje e me e marrë vesh, që dora e Jehovait e ka bo këtë edhe i Shenjti i Izraelit e ka kriju.“
21 „Qiteni përpara çështjen tuej“, thotë Jehovai. „Tregoni argumentet tueja“, thotë Mbreti i Jakobit.
22 „Sillni prova edhe na tregoni krejt qka ka me ndodhë. Na kallxoni qka ka ndodhë ma herët, që me mujtë me menu për ato gjana e me marrë vesh qysh kanë përfundu, ose na kallxoni qka ka me ndodhë ma vonë.
23 Na tregoni qka ka me ndodhë në t'ardhmen, që me e ditë se ju jeni zota. Po, boni diçka, qoftë t'mirë a t'keqe, që me u habitë kur ta shohim.
24 Shihni! Ju jeni hiq kurgjo edhe qka boni ju s'asht kurgjo. Aj që ju zgjedh juve asht i neveritshëm.
25 Unë e kam bo nji njeri me dalë pi veriut edhe aj ka me ardhë, nji njeri pi lindjes që ka me e thirrë emnin tem. Aj ka me i shkelë sundimtarët sikur t'ishin baltë, si poçari që e shkel argjilën e lagët.
26 Kush e ka tregu këtë qysh pi fillimit, që na me mujtë me e ditë, ose e ka kallxu ma herët, që na me mujtë me thanë: ‚Aj e ka drejt‘? Në të vërtetë, askush s'e ka lajmëru! Askush s'e ka shpallë! Kurrkush s'e ka ni as nji fjalë pi ju!“
27 Unë jom i pari që i kam thanë Sionit: „Shih! Qe ku janë!“ Edhe në Jerusalem kam me çu nji lajmëtar me lajme t'mira.
28 Po unë kam kqyrë, e s'ka pasë askënd. Në mesin e tyne s'ka pasë asnji këshilltar. Edhe unë vazhdimisht u kam kërku përgjigje.
29 Shihni! Krejt ata jonë veç iluzion. Punët e tyne s'janë kurgjo. Figurat e tyne pi metali jonë veç erë edhe kurgjo reale.