Danieli 8
1 Në vitin e tretë t'mbretnimit t'mbretit Belshazar, unë, Danieli, kam pa edhe nji vegim tjetër.
2 Kur e kam pa këtë vegim, e kam pa veten n'kalanë e Susës, në krahinën e Elamit. Derisa po i shikoja krejt këto, u konë te rrjedha e ujit Ulai.
3 I kam çu sytë edhe papritmas e kam pa nji dash me dy brina, që rrike para rrjedhës së ujit. Të dy brinat u konë t'mdhaj, po njani u konë ma i madh se tjetri, edhe brini ma i madh u rrit ma vonë.
4 E kam pa dashin tu godit me brina kah perëndimi, veriu edhe jugu. Asnji kafshë e egër s'ka mujt me i qëndru përballë, edhe s'ka pas kush me i shpëtu ata që i ka pas nën pushtetin e vet. Aj ka ba qka ka dasht vetë edhe u ba shumë i madh.
5 Derisa po shikoja hala, papritmas e kam pa nji cjap tu ardh pi perëndimit. Aj e ka kalu krejt tokën pa e prek tokën me kambë. Cjapi e ka pas nji bri që binte shumë n'sy, mu mes syve.
6 Aj u nis drejt dashit me dy brina, që e kam pa tu qëndru para rrjedhës së ujit. Ka vrapu drejt tij me nji tërbim t'madh.
7 E kam pa cjapin tu iu vërsul dashit me shumë inat. E ka sulmu edhe ia ka thy të dy brinat. Dashi s'ka pas fuqi me i qëndru përballë. Cjapi e ka rrëzu për toke edhe e ka shkel me kambë, edhe s'ka pas kush me e shpëtu dashin pi pushtetit t'tij.
8 Mas kësaj, cjapi u ba jashtëzakonisht i madh. Po sapo u ba shumë i fuqishëm, brini i tij i madh u thy. Në vend t'tij u rritën katër brina që binin shumë n'sy, të drejtuem kah të katër anët e botës.
9 Pi njanit pi atyne brinave ka dalë edhe nji bri tjetër, nji bri i vogël, që u rrit shumë, kah jugu, kah lindja edhe kah Vendi i Bukur.
10 Aj bri u rrit aq shumë, sa arriti deri te ushtria e qiellit. I ka rrëzu n'tokë disa pi ushtrisë edhe disa pi yjeve, edhe i ka shkel me kambë.
11 Aj u ba aq i madh, sa u ngrit bile edhe kundër Kryetarit t'ushtrisë. Kryetarit iu hoq kurbani që jepej vazhdimisht, edhe vendi i fortë i shenjtërores së tij u rrëzu.
12 Për shkak t'shkeljes, brinit iu dorëzu nji ushtri bashkë me kurbanin që jepej vazhdimisht. Aj vazhdimisht e ka shkel t'vërtetën për toke, ka ba qka ka dasht edhe ia ka dalë mbarë.
13 Atëherë e kam ni njanin pi t'shenjtëve tu fol, edhe nji tjetër i shenjtë e ka vet: „Sa ka me zgjatë ky vegim për kurbanin që jepej vazhdimisht, për shkeljen që shkakton shkatërrim, edhe për atë që vendi i shenjtë bashkë me ushtrinë kanë me u shkel me kambë?“
14 Atëherë aj m'ka thanë: „Deri sa të kalojnë 2300 mbramje edhe mëngjese. Masanej vendi i shenjtë ka me u kthy pa tjetër n'gjendjen e vet t'drejtë.“
15 Derisa unë, Danieli, po e shikoja vegimin edhe po mundohesha me e kuptu, papritmas e kam pa dikon tu qëndru para meje, që dukej si nji burrë.
16 Masanej e kam ni zanin e nji njeriu pi mesi i rrjedhës së Ulait, që ka thirr: „Gabriel, bane këtë njeri me e kuptu qka ka pa.“
17 Atëherë aj u afru te vendi ku po qëndroja unë. Po kur erdh afër, u frikësova aq shumë, sa rashë për toke. Aj m'ka thanë: „O bir i njeriut, duhet me e kuptu që ky vegim ka t'bajë me kohën e fundit.“
18 Derisa aj po m'folte, m'ka zanë nji gjumë i randë, edhe rashë me ftyrë për toke. Po aj m'ka prek edhe m'ka çu prapë n'kambë, aty ku u konë tu qëndru.
19 Masanej m'ka thanë: „Kam me ta kallxu qka ka me ndodh në fund t'kohës së dënimit, se ky vegim ka t'bajë me kohën e caktume t'fundit.
20 Dashi me dy brina që e ke pa, i paraqet mbretat e Medisë edhe Persisë.
21 Cjapi me qime t'gjata e paraqet mbretin e Greqisë, kurse brini i madh mes syve t'tij e paraqet mbretin e parë.
22 Sa për brinin që u thy edhe katër brinat që dolën n'vend t'tij, pi atij kombi kanë me dalë katër mbretni, po s'kanë me e pas fuqinë që e ka pas aj.
23 Kah fundi i sundimit t'atyne mbretave, kur ata që i shkelin ligjet ta kenë mbush masën e punëve t'veta, ka me dalë nji mbret me pamje t'egër, që din me fol me fjalë që kanë dy kuptime.
24 Fuqia e tij ka me u ba shumë e madhe, po jo me forcën e vet. Aj ka me shkaktu shkatërrim t'jashtëzakonshëm, ka me pas sukses edhe ka me arrit shumë. Ka me i shkatërru njerëzit e fuqishëm, bile edhe popullin që përbahet pi t'shenjtëve.
25 Me dinakërinë e vet, aj ka me mashtru që me pas sukses, edhe n'zemër ka me e mbajt veten shumë t'madh. Në nji kohë kur njerëzit kanë me u ndi t'sigurt, aj ka me i shkatërru shumë pi tyne. Bile ka me u ngrit edhe kundër Princit t'princave, po ka me u thy, veç jo me dorë t'njeriut.
26 Ajo që u tha n'vegim për mbramjet edhe mëngjeset asht e vërtetë. Po ti duhet me e mbajt t'fshehtë këtë vegim, se ka t'bajë me nji kohë shumë t'largët n'ardhmen.“
27 Unë, Danieli, u lodha krejt edhe u smuva për disa ditë. Masanej u çova edhe nisa prapë me u marrë me punët e mbretit. Po hala u konë krejt i hutum pi asaj që e kam pa, edhe askush s'ka mujt me e kuptu.