Jeremia 43
1 Kur Jeremia e ka kry me ia tregu krejt popullit të gjitha fjalët e Jehovës, Zotit t’tyne, secilën fjalë që Jehovai, Zoti i tyne, e kish porositë me ua thanë,
2 Asarja, djali i Hoshajës, Johanani, djali i Kareahut, edhe krejt burrat që e mbajshin veten t’mëdhej, i kanë thanë Jeremisë: “Ti po rren! Jehovai, Zoti jonë, s’të ka çu me na thanë: ‘Mos shkoni n’Egjipt me jetu atje.’
3 Po Baruku, djali i Nerijës, po t’shtin kundër neve, që me na dorëzu te kaldejt, që ata me na vra a me na çu rob n’Babiloni.”
4 Johanani, djali i Kareahut, krejt komandantët e ushtrisë edhe krejt populli s’e kanë ngju zanin e Jehovës, e s’kanë nejt n’vendin e Judës.
5 Përkundrazi, Johanani, djali i Kareahut, edhe krejt komandantët e ushtrisë i kanë marrë me veti krejt ata që kishin mbetë pi Juda e që ishin kthy me banu n’vendin e Judës. Ata ishin kthy pi krejt popujt ku i kishin shpërnda.
6 I kanë marrë me veti burrat, gratë, fëmijët, vajzat e mbretit edhe krejt ata që Nebusaradani, kryetari i rojave, i kish lonë te Gedalja, djali i Ahikamit, djalit t’Shafanit, si edhe profetin Jeremia edhe Barukun, djalin e Nerijës.
7 Kanë shku n’Egjipt, se s’e kanë ngju zanin e Jehovës, edhe kanë mbërri deri n’Tahpanhes.
8 N’Tahpanhes, Jeremisë i ka ardh ky mesazh pi Jehovës:
9 “Merri do gurë t’mëdhej edhe fshehi n’llaç, te vendi me tulla para hyrjes t’shpisë t’faraonit n’Tahpanhes, para syve t’burrave çifutë.
10 Pastaj thuaju atyne: ‘Kështu thotë Jehovai, Zoti i ushtrive, Perëndia i Izraelit: “Unë po e thërras shërbëtorin tem Nebukadnezarin, mbretin e Babilonisë, edhe kam me ia vnu fronin pikërisht mbi këta gurë që i kom fshehë. E aj ka me e shtri çadrën e vet mbretnore mbi ta.
11 Aj ka me ardh edhe ka me e goditë Egjiptin. Kujt i asht caktu me vdekë pi murtaja, ka me e gjetë murtaja. Kujt i asht caktu me shku n’robni, ka me shku n’robni. E kujt i asht caktu me vdekë pi shpata, ka me e gjetë shpata.
12 Unë kam me ua shti zjarrin tempujve t’perëndive t’Egjiptit, edhe aj ka me i kallë ata tempuj e ka me i marrë perënditë rob me veti. Aj ka me e mbështjellë Egjiptin rreth vetes, qysh mbështillet nji bari me petkun e vet, edhe ka me u largu pi aty n’paqe.
13 Edhe shtyllat e Beth-Shemeshit n’Egjipt ka me i thy copë, e tempujt e perëndive t’Egjiptit ka me i kallë me zjarr.”’”