Kangë t'shejta 51
1 Ki dhimt për mu, o Zot, me dashninë tande besnike.
Me dhimtën tande të madhe, m'i fshi krejt shkeljet e mia.
2 Ma laj mirë krejt fajin tem
edhe m'pastëro pi gjynahit tem.
3 Se unë i di shumë mirë shkeljet e mia,
edhe gjynahi jem s'po më hiqet pi mendjes.
4 Kundër teje, mbi krejt kundër teje, kom bo gjynah.
Kom bo atë që asht keq në sytë e
tu. Për qata, ti ke të drejtë në
krejt qka thu, edhe gjykimi yt asht i drejtë.
5 Fajtor kom lindë, edhe nana
jem m'ka ngjizë në gjynah.
6 Ti gëzohesh kur njeriu e ka të vërtetën në zemër.
Më mëso mençuni të vërtetë thellë mrena meje.
7 M'pastëro pi gjynahit me hisop, që me u bo i pastër.
M'laj, që me u bo ma i bardhë se bora.
8 M'le me i ni zanet e gëzimit e të harese,
që eshnat që m'i ke thy me u gjallnu apet.
9 Ktheje ftyrën anej pi gjynaheve të mia
edhe m'i fshi krejt fajet e mia.
10 Ma krijo nji zemër të pastër, o Zot, edhe
vnome mrena nji frymë të re e të palëkundun.
11 Mos m'qit larg pi pranisë tande edhe
mos ma merr frymën tande të shenjtë.
12 Ma kthe gëzimin për shpëtimin që vjen pi teje.
Ma zgjo vullnetin me t'ngu.
13 Unë kam me ua mësu rrugët e tua atyne që e shkelin
ligjin, që ata që bojnë gjynahe me u kthy te ti.
14 M'shpëto pi fajit për gjakun e derdhun, o Zot, ti Zoti i
shpëtimit tem, që gjuha jem me folë plot gëzim për drejtësinë tande.
15 O Jehova, m'i çel buzët, që goja
jem me e shpall lavdinë tande.
16 Se ti s'don kurban, se përndryshe ta kisha dhonë.
Kurbanet që digjen krejt s'të gëzojnë.
17 Kurbani që i pëlqen Zotit asht nji shpirt i përulun e i pendum.
Nji zemër të thyme e të dërrmume, o Zot, ti s'ke me e kthy mbrapsht.
18 Kallxoje mirësinë tande, tu i bo mirë Sionit.
Ndërtoji muret e Jerusalemit.
19 Atëher kanë me t'pëlqy kurbanet e drejtësisë, kurbanet që
digjen në zjarr edhe kurbanet që digjen krejt.
Atëher kanë me u fliju dema në altarin tand.