Letra e dytë e Mbreterve 10
1 Ahabi i ka pasë 70 djem në Samari. Jehu ka shkru letra edhe i ka çu në Samari te burrat kryesorë të Jezreelit, te pleqtë edhe te ata që kujdeseshin për fëmijët e Ahabit. Në letra shkrujke:
2 “Kur t’ju mbërrin kjo letër, djemtë e zotnisë juj jonë te ju. Ju i keni edhe qerret e luftës, kuajt, armët edhe nji qytet t’fortifikum.
3 Zgjedhne ma t’mirin edhe ma t’zotin pi djemve t’zotnisë juj edhe vnojeni në fronin e babës t’vet. Pastaj luftoni për shpinë e zotnisë juj.”
4 Po atyne ju ka hi frika edhe kanë thanë: “Kqyrni, kur as dy mbretat s’kanë mujt me i dalë përballë, qysh mujna na me ia dalë?”
5 Atëherë aj që e mbikëqyrke pallatin, kryetari i qytetit, pleqtë edhe kujdestarët ia kanë çu Jehut këtë fjalë: “Na jemi në shërbimin tand edhe e bojmë krejt qka na thu. Na s’e bojmë kërkon mbret. Bane qka t’duket ty mirë.”
6 Atëherë Jehu ua ka shkru edhe nji letër tjetër, ku u thojke:
“Nëse jeni me mu edhe doni me ma ni fjalën, nesër n’këtë kohë m’i bini kryet e djemve t’zotnisë juj në Jezreel.” 70 djemtë e mbretit jonë konë te burrat me nam t’qytetit, që i kanë rritë edhe i kanë eduku.
7 Sa ka mbërrit letra, ata i kanë vra krejt 70 djemtë e mbretit. Ua kanë shti kryet nëpër shporta edhe ia kanë çu Jehut në Jezreel.
8 Lajmëtari ka hi mrena edhe ka lajmëru: “I kanë pru kryet e djemve t’mbretit.” Jehu ka urdhnu: “Boni dy grumbuj me to te hyrja e portës së qytetit edhe leni aty deri në mëngjes.”
9 Në mëngjes, kur ka dalë jashtë, ka dalë para popullit edhe ka thanë: “Ju s’keni faj. Po, unë kom bo komplot kundër zotnisë tem edhe e kom vra. Ama kush i ka vra krejt këta?
10 Pi kësaj e shihni që asnji fjalë e Jehovait, asnji sen pi atyne që Jehova i ka thanë për shpinë e Ahabit, s’ka me metë pa u plotësu. Jehova e ka bo krejt qka ka lajmëru përmes shërbëtorit t’vet, Elisë.”
11 Jehu i ka vra edhe krejt ata pi shpisë së Ahabit që jonë konë në Jezreel, bashkë me krejt burrat e tij me nam, njerëzit e tij t’afërt edhe priftërinjtë e tij. S’ka lanë asnji gjallë.
12 Pastaj Jehu ka marrë rrugën për Samari. Rrugës u konë shpija e lidhjes së barinjve.
13 Aty Jehu i ka taku vllaznitë e mbretit Ahazja t’Judës. “Kush jeni ju?”, i ka vetë. Ata i kanë thanë: “Na jemi vllaznitë e Ahazjës. Jemi nisë me marrë vesh a jonë mirë djemtë e mbretit edhe djemtë e nanës mbretneshë.”
14 “Kapni t’gjallë!”, ka urdhnu aj. Atëherë i kanë kapë edhe i kanë vra te cisterna e shpisë së lidhjes, krejt 42 burra. S’ka lanë asnji pi tyne gjallë.
15 Kur Jehu ka vazhdu rrugën pi aty, i ka dalë përpara Jonadabi, djali i Rekabit.
Jehu e ka përshëndetë edhe e ka vetë:
“A je me mu me krejt zemër, qysh jom edhe unë me ty?” “Po”, i ka thanë Jonadabi.
“Atëherë ma jep dorën.” Jonadabi ia ka zgjatë dorën edhe Jehu e ka tërhjekë me hyp në qerren e luftës.
16 Jehu i ka thanë: “Hajde me mu edhe ke me pa që unë s’e duroj kërkon që i del kundër Jehovait.” Edhe e ka marrë me veti në qerren e luftës.
17 Në fund Jehu ka mbërrit në Samari edhe i ka vra krejt ata pi shpisë së Ahabit që kanë metë gjallë, derisa i ka zhdukë krejt, qysh Jehova i ka thanë Elisë.
18 Pastaj Jehu e ka mbledhë krejt popullin edhe ka thanë: “Ahabi e ka adhuru Baalin pak, po Baali ka me pasë shumë ma shumë adhurim pi meje, Jehut.
19 Thirrni te unë krejt profetët e Baalit, krejt ata që e adhurojnë edhe krejt priftërinjtë e tij. Unë po du me i bo Baalit nji kurban t’madh edhe s’bon me mungu kërkush. Kush s’vjen, ka me vdekë.” Po krejt kjo u konë nji mashtrim i mençëm. Jehu ka dashtë me i zhdukë ata që e adhuronin Baalin.
20 Jehu ka thanë edhe: “Shpallne nji mbledhje festive për Baalin.” Edhe ata e kanë bo.
21 Pastaj Jehu ka çu fjalë në krejt Izraelin edhe kanë ardhë krejt ata që e adhuronin Baalin, pa përjashtim. Jonë mbledhë në shpinë e Baalit, derisa u mush plot me njerëz, pi njonit skaj deri te tjetri.
22 Jehu i ka thanë atij burrit që kujdeseshke për rrobat: “Nxirr rroba për krejt ata që e adhurojnë Baalin.” Edhe aj ua ka nxjerrë rrobat.
23 Pastaj Jehu edhe Jonadabi, djali i Rekabit, kanë hi në shpinë e Baalit. Jehu u ka thanë atyne që e adhuronin Baalin: “Kqyrni mirë përreth edhe sigurohuni që këtu me konë veç ata që e adhurojnë Baalin, e mos me pasë asnji që e adhuron Jehovain.”
24 Në fund kanë hi mrena me bo kurbane që digjen krejt edhe kurbane tjera. Jehu i ka vendosë jashtë 80 burra edhe u ka thanë: “Nëse dikush pi juve e len me ikë njonin pi këtyne burrave që po ua lë në dorë, ka me pagu me jetën e vet.”
25 Sapo Jehu e ka kry kurbanin që digjet krejt, u ka urdhnu rojeve edhe ndihmësve: “Hyni mrena, vritni! Mos e leni asnjënin me ikë!” Atëherë rojet edhe ndihmësit i kanë vra me shpata edhe i kanë qitë trupat e tyne jashtë. Kanë hi deri në vendin ma t’shenjtë mrena shpisë së Baalit.
26 Pastaj i kanë nxjerrë shtyllat e shenjta pi shpisë së Baalit edhe i kanë djegë.
27 E kanë rrëzu shtyllën e shenjtë të Baalit edhe e kanë rrënu shpinë e tij. Atë vend e kanë bo nevojtore publike, që asht aty hala sot.
28 Kështu Jehu e ka zhdukë adhurimin e Baalit në Izrael.
29 Po Jehu s’u largu pi mëkatet ku e ka shti Izraelin Jeroboami, djali i Nebatit. I ka lanë viçat e artë në Bethel edhe në Dan.
30 Jehova i ka thanë Jehut: “Ti e ke bo krejt qka kom pasë në mend për shpinë e Ahabit. Me këtë ke vepru mirë edhe ke bo qka asht e drejtë n’sytë e mi. Prandaj Izraeli ka me i pasë djemtë e tu mbretër për katër breza.”
31 Ama Jehu s’u kujdes me e mbajt ligjin e Jehovait, Zotit t’Izraelit, me krejt zemër. S’u largu pi mëkatet ku Jeroboami e ka shti Izraelin.
32 Pi asaj kohe Jehova ka fillu me ia zvogëlu Izraelit tokën pak ka pak. Hazaeli e ka sulmu Izraelin vazhdimisht në krejt atë territor,
33 në lindje të Jordanit, në krejt tokën e Gileadit, në tokat e fiseve të Gadit, Rubenit edhe Manaseut, pi Aroerit te lugina e Arnonit deri në Gilead edhe Bashan.
34 Krejt tjerat për historinë e Jehut, krejt qka ka bo edhe sa pushtet ka pasë, jonë t’shkrume në librin e kronikave t’mbretave t’Izraelit.
35 Në fund Jehu ka vdekë edhe e kanë varrosë në Samari. Mas tij, mbret u bo djali i tij Jehoahazi.
36 Jehu ka sundu mbi Izraelin 28 vjet në Samari.