Letra e dytë e Mbreterve 13
1 Në vitin e 23-të të Joasit, djalit t’Ahazjës, mbretit t’Judës, Jehoahazi, djali i Jehut, u bo mbret i Izraelit në Samari. Aj ka sundu 17 vjet.
2 Ka vazhdu me bo qka u konë keq në sytë e Jehovait edhe ka vazhdu me bo mëkatin ku Jeroboami, djali i Nebatit, e ka shti Izraelin. S’u largu pi atij mëkati.
3 Atëherë Jehova u zemëru shumë me Izraelin edhe gjatë krejt asaj kohe e ka lanë nën pushtetin e Hazaelit, mbretit të Sirisë, edhe të djalit të tij, Ben-Hadadit.
4 Në fund Jehoahazi iu ka lutë me përgjërim Jehovait, edhe Jehova ia ka ni lutjen, se e ka pa sa shumë po vujke Izraeli nën mbretin e Sirisë.
5 Prandaj Jehova ia ka çu Izraelit nji shpëtimtar për me e çliru pi duarve të sirianëve, edhe izraelitët kanë mujt me jetu prapë në shpitë e veta, qysh kanë jetu përpara.
6 (Po ata s’kanë hjekë dorë pi mëkati i shpisë së Jeroboamit, ku Jeroboami e ka shti Izraelin. Kanë vazhdu me e bo atë mëkat, edhe shtylla e shenjtë në Samari ka metë aty.)
7 Jehoahazit i kishin metë veç 50 kalorës, 10 qerre t’luftës edhe 10 000 ushtarë t’këmbësorisë. Tjerët i ka zhdukë mbreti i Sirisë. I ka shkelë si pluhunin në lëmë.
8 Krejt tjerat për historinë e Jehoahazit, krejt qka ka bo edhe sa pushtet ka pasë, jonë t’shkrume në librin e kronikave t’mbretave t’Izraelit.
9 Në fund Jehoahazi ka vdekë edhe e kanë varrosë në Samari. Mas tij mbret u bo djali i tij, Joasi.
10 Në vitin e 37-të të mbretit Joas t’Judës, Joasi, djali i Jehoahazit, u bo mbret i Izraelit në Samari edhe ka sundu 16 vjet.
11 Ka vazhdu me bo qka u konë keq në sytë e Jehovait edhe s’ka hjekë dorë pi mëkatet ku Jeroboami, djali i Nebatit, e ka shti Izraelin. Ka vazhdu me i bo ato mëkate.
12 Krejt tjerat për historinë e Joasit, krejt qka ka bo, sa pushtet ka pasë edhe qysh ka luftu kundër Amazjës, mbretit t’Judës, jonë t’shkrume në librin e kronikave t’mbretave t’Izraelit.
13 Pastaj Joasi ka vdekë edhe Jeroboami ka hyp në fron. Joasin e kanë varrosë në Samari bashkë me mbretat e Izraelit.
14 Kur Elisa u sëmurë, pi asaj sëmundjeje që ma vonë edhe ka vdekë, Joasi, mbreti i Izraelit, ka shku me e vizitu. Tu kajtë, Joasi i ka thanë: “Baba jem! Baba jem! Qerrja e luftës edhe kalorësit e Izraelit!”
15 Elisa i ka thanë: “Merre nji hark edhe shigjeta.” Edhe aj i ka marrë.
16 “Merre harkun në dorë”, i ka thanë Elisa mbretit t’Izraelit. Mbreti e ka marrë harkun në dorë, edhe Elisa i ka vnu duart e veta mbi duart e mbretit.
17 Pastaj Elisa i ka thanë: “Çele dritaren kah lindja.” Kur aj e ka çelë, Elisa i ka urdhnu: “Gjuj!” Edhe aj ka gjujtë. Elisa ka bërtitë: “Shigjeta e fitores së Jehovait, shigjeta e fitores kundër Sirisë! Ti ke me e mundë Sirinë krejtësisht në Afek.”
18 Pastaj Elisa i ka thanë: “Merri shigjetat!” Mbreti i Izraelit i ka marrë, edhe Elisa i ka urdhnu: “Bjeri tokës me to!” Mbreti i ka ra tokës tri herë edhe pastaj u nalë.
19 Atëherë njeriu i Zotit t’vërtetë u zemëru edhe i ka thanë: “U dashtë me i ra tokës pesë a gjashtë herë! Atëherë e kishe mundë Sirinë krejtësisht! Po tash ke me e mundë veç tri herë.”
20 Mas kësaj Elisa ka vdekë edhe e kanë varrosë. Në fillim të vitit, grupe plaçkitësish moabitë kanë hy vazhdimisht në vend.
21 Nji herë, kur do burra po e varrosnin nji të vdekun, papritmas e kanë pa nji grup plaçkitësish. E kanë gjujtë shpejt të vdekunin në varrin e Elisës edhe kanë ikë. Kur aj i ka prekë eshnat e Elisës, u ngjall prapë edhe u çu në kamë.
22 Gjatë krejt kohës që Jehoahazi ka sundu, Hazaeli, mbreti i Sirisë, e ka shtypë Izraelin.
23 Po Jehova u ka tregu mirësi. I ka ardhë gjynah për ta edhe u ka kthy kah ata për shkak të besëlidhjes që e ka bo me Abrahamin, Isakun edhe Jakobin. S’ka dashtë me i zhdukë, edhe deri sot s’i ka braktisë.
24 Kur ka vdekë Hazaeli, mbreti i Sirisë, mbret u bo djali i tij, Ben-Hadadi.
25 Joasi, djali i Jehoahazit, ia ka marrë prapë Ben-Hadadit, djalit të Hazaelit, qytetet që Hazaeli ia kishte marrë në luftë babës së tij, Jehoahazit. Joasi e ka mundë Ben-Hadadin tri herë edhe i ka marrë prapë qytetet e Izraelit.