Letra e dytë e Shembujve 15
1 Masanej Fryma e Zotit erdh mbi Asarjan, djalin e Odedit.
2 Atëher aj i doli përpara Asës edhe i tha: “Asa, edhe ju krejt të Judës e të Benjaminit, m'ngoni mirë! Jehova asht me ju, për sa kohë që ju rrini me të. Nëse e lypni, keni me e gjetë. Po nëse e lini, edhe aj ka me ju lanë.
3 Izraeli ma herët ka jetu për nji kohë të gjatë pa Zotin e vërtetë, pa nji prift që i msonte edhe pa ligj.
4 Po kur i ranë ngushtë, u kthyn te Jehova, Zoti i Izraelit, edhe e lypën, aj i la me e gjetë.
5 Në qat kohë, kush u nis për rrugë s'mujke me u ndi i sigurt, se kish shumë trazina mes njerzve në krejt vendin.
6 Popujt luftojshin me njani-tjetrin, e edhe qytetet mes veti, se Zoti nuk i la me pas qetësi për shkak të telasheve të gjithfarshme.
7 Po ju tash rrini të fortë! Mos e hupni guximin! Për punën që po e boni, keni me u shpërbly.”
8 Kur Asa i ka ni kto fjalë edhe profecinë e profetit Oded, ka marrë zemër edhe i ka hjek idhujt e neveritshëm pi krejt tokës së Judës e të Benjaminit, edhe pi qyteteve që i kish marrë në malet e Efraimit. E ka ndreq edhe altarin e Jehovës që u konë para hajatit të shpisë së Jehovës.
9 Aj e ka mbledhë krejt Judën e Benjaminit, bashkë me të huejt pi Efraimi, Manaseu edhe Simeoni, që jetojshin mes tyne. Shumë veta pi Izraeli kishin kalu në anën e tij, se e kishin pa që Jehova, Zoti i tij, po e ndihmonte.
10 Ata u mblodhën në Jerusalem në mujin e tretë të vitit të 15-të të sundimit të Asës.
11 Atë ditë i banë kurban Jehovës 700 krerë gjedhë edhe 7.000 dele pi plaçkës që e kishin pru me veti.
12 Ata e banë edhe nji besëlidhje, ku u zotun që kanë me e lyp Jehovën, Zotin e të parëve të tyne, me krejt zemrën edhe me krejt shpirtin.
13 Kush s'e lyp Jehovën, Zotin e Izraelit, ka me u dënu me vdekje, qoftë i vogël a i madh, burrë a grue.
14 Kështu ata u betun para Jehovës me za të naltë e me brohoritje, ndërsa u bijshin trumbetave edhe brinave.
15 Krejt Juda u gëzu shumë për betimin që e kishin ba me krejt zemër. Ata e lypën Jehovën me zell të madh, edhe aj i la me e gjetë. Aj vazhdoi me ju dhanë qetësi gjithkah përreth.
16 Mbreti Asa e hoqi bile edhe gjyshen e vet, Maakën, pi pozitës së nanës mbretneshë, se ajo e kish bo nji figurë idhulli të flliqt për me adhuru shtyllën e shenjtë. Asa e rrëzoi qat figurë të neveritshme, e bani copë-copë edhe e dogji në luginën e Kidronit.
17 Po vendet e nalta të adhurimit në Izrael nuk u hjekën. Prapëseprapë, Asa i qëndroi besnik Zotit me krejt zemër, gjatë tanë jetës së vet.
18 Aj e ka pru në shpinë e Zotit të vërtetë argjendin, arin edhe sene të ndryshme që aj edhe baba i vet ia kishin kushtu Zotit.
19 Deri në vitin e 35-të të sundimit të Asës, s'ka pas luftë.