Letra e dytë e Shembujve 2
1 Masanej Salomoni ka dhanë urdhën me u ndërtu nji shpi për nder të emnit të Jehovës edhe nji pallat mbretëror për veti.
2 Salomoni i ka caktu 70 000 burra me punu si punëtorë të thjeshtë, 80 000 me pre gurë në male edhe 3600 me i mbikëqyrë.
3 Salomoni i ka çu edhe nji fjalë Hiramit, mbretit të Tirit: “Ti i ke çu babës tem Davidit dru cedri, që me mujtë me ndërtu nji pallat për veti. Për qata tash po të lus edhe unë.
4 Unë po ndërtoj nji shpi për nder të emnit të Jehovës, Zotit tem. Kam me ia kushtu atij si vend të shenjtë, që aty me djegë temjan me erë të mirë përpara tij. Aty ka me pasë gjithmonë bukë të rendituna, edhe kanë me u ofru kurbane që digjen krejt, në mëngjes e në mramje, ditëve të sabatit, ditëve të hanës së re edhe gjatë festave të Jehovës, Zotit tonë. Kjo asht detyrë e përhershme për Izraelin.
5 Shpia që kam me ndërtu ka me konë e madhe edhe shumë e bukur, se Zoti jonë asht ma i madh se krejt zotat tjerë.
6 Po kush munet me ia ndërtu atij nji shpi? As qiejt, as qiejt ma të naltë s'mujnë me e nxanë. E kush jom unë me i ndërtu nji shpi, përveçse për me djegë kurbane përpara tij, që tymi me u çu nalt?
7 Të lutna, ma ço nji mjeshtër që din me punu mirë me dukat, argjend, bakër e hekur, me lesh të ngjyrosun vjollcë, me fije të kuqe të ndezuna e të kaltra, edhe që din me gdhendë. Aj ka me punu në Judë e Jerusalem bashkë me mjeshtrit e mi që mi ka lanë në dispozicion baba jem Davidi.
8 M'i ço edhe trungje cedri, dëllinje e algumi pi Libani. Se ti ke burra me përvojë që dinë me i pre drujt e Libanit. Shërbëtorët e mi kanë me punu bashkë me shërbëtorët e tu,
9 për me përgatitë shumë dru ndërtimi, se shpia që kam me ndërtu ka me konë jashtëzakonisht e madhe edhe shumë e bukur.
10 E për burrat e tu që presin dru, kam me siguru ushqim: 20 000 kor grunë, 20 000 kor elb, 20 000 bath venë edhe 20 000 bath vaj.”
11 Atëherë Hirami, mbreti i Tirit, i ka shkru Salomonit: “Jehova të ka bo mbret se e don popullin e vet.”
12 Hirami i ka shkru edhe: “Qoftë i lavdum Jehova, Zoti i Izraelit, që i ka bo qiellin edhe tokën, se mbretit David i ka dhanë nji djalë të mençëm, që din me mendu mirë edhe ka kuptim. Aj ka me ndërtu nji shpi për Jehovën edhe nji pallat mbretëror për veti.
13 Tash po ta çoj Hiram-Abin, nji mjeshtër të zotin e të mençëm.
14 Aj asht djali i nji gruje pi fisit të Danit, kurse baba i tij u konë pi Tiri. Aj ka përvojë me punu me dukat, argjend, bakër, hekur, gurë, dru, lesh të ngjyrosun vjollcë, fije të kaltra e të kuqe të ndezuna edhe pëlhurë të hollë. Din me bo gdhendje të çdo lloji edhe me punu çfarëdo modeli që i kërkohet. Ka me punu bashkë me mjeshtrit e tu edhe me mjeshtrit e babës tand, zotnis tem Davidit.
15 Tash, o zotnia jem, na e ço grunin, elbin, vajin edhe venën që ua ke premtu shërbëtorëve tu.
16 Na kemi me pre aq dru në Liban sa të duhen, kemi me i lidhë trungjet bashkë si lundra edhe kemi me i çu përmes detit deri në Jopë. Masanej ti munesh me i marrë e me i çu në Jerusalem.”
17 Masanej Salomoni i ka numru krejt burrat e huj që jetojshin në tokën e Izraelit, qysh i kishte numru edhe baba i tij Davidi. Kanë dalë 153 600 veta.
18 Pi tyne, 70 000 i ka caktu si punëtorë të thjeshtë, 80 000 me pre gurë në male edhe 3600 me i mbikëqyrë e me i shty njerzit me punu.