Letra e dytë e Shembujve 33
1 Manase u bo mbret kur i ka pasë 12 vjet, edhe ka sundu 55 vjet n'Jerusalem.
2 Aj ka bo qka u konë e keqe n'sytë e Jehovait, se i ka marrë zakonet e neveritshme t'popujve që Jehovai i ka përzanë para popullit t'Izraelit.
3 Aj i ka ndërtu prapë vendet e nalta që baba i vet, Hiskija, i kishte rrënu. Ka ngritë altare për Baalët edhe ka bo shtylla t'shenjta. Gjithashtu u ka përkulë krejt ushtrisë së qiellit edhe u ka shërby atyne.
4 Përveç kësaj, ka ndërtu altare n'shpinë e Jehovait, për t'cilën Jehovai kishte thanë: “Emri jem ka me konë përgjithmonë n'Jerusalem.”
5 Aj ka ngritë altare për krejt ushtrinë e qiellit n'dy oborret e shpisë së Jehovait.
6 Aj i ka djegë djemtë e vet si kurban n'luginën e djalit t'Hinomit. U marrë me magji, me parashikim t'fatit edhe me fall, edhe ka caktu njerëz që flasin me shpirta e fallxhorë. Ka bo shumë sene t'kqija n'sytë e Jehovait, edhe qashtu e ka fye atë.
7 Aj e ka vendosë idhullin që e kishte bo n'shpinë e Zotit t'vërtetë. Për qat shpi, Zoti i kishte thanë Davidit edhe djalit t'tij, Solomonit: “Kjo shpi edhe Jerusalemi, që e kom zgjedhë pi krejt fiset e Izraelit, kanë me e mbajtë emrin tem përgjithmonë.
8 Edhe unë s'kam me i largu ma izraelitët pi vendit që ua kom caktu t'parëve t'tyne, veç nëse ata i zbatojnë me kujdes krejt urdhnat e mi, krejt Ligjin, rregullat edhe vendimet që ua kom dhanë përmes Moisiut.”
9 Manase ka vazhdu me i shty njerëzit e Judës edhe banorët e Jerusalemit me bo sene edhe ma t'kqija se popujt që Jehovai i kishte shkatërru kur izraelitët e morën atë vend.
10 Jehovai i ka folë vazhdimisht Manases edhe popullit t'tij, ama ata s'e kanë ngu.
11 Për qata Jehovai i ka çu komandantët e ushtrisë së mbretit t'Asirisë kundër tyne. Ata e kanë kapë Manasen me grepa, e kanë lidhë me dy zingjirë pi bakri edhe e kanë çu n'Babiloni.
12 Kur u konë n'hall t'madh, aj i asht lutë me krejt zemër Jehovait, Zotit t'vet, edhe vazhdimisht e ka përulë veten thellë para Zotit t'të parëve t'vet.
13 Aj u lut vazhdimisht te Jehovai. Zotit i ka prekë zemrën lutja e tij edhe ia ka ni lutjet që ia ka bo me krejt zemër. E ka kthy Manasen prapë si mbret n'Jerusalem. Atëherë Manase e ka kuptu që Jehovai asht Zoti i vërtetë.
14 Mas kësaj, aj ka ndërtu nji mur t'jashtëm për qytetin e Davidit. Muri u konë shumë i naltë, edhe kalonte n'perëndim t'burimit t'Gihonit, nëpër luginë, rreth Ofelit, deri te Porta e Peshqve. Përveç kësaj, ka caktu komandantë t'ushtrisë n'krejt qytetet e fortifikuara t'Judës.
15 Masanej i ka hjekë zotat e huj edhe idhullin pi shpia e Jehovait, bashkë me krejt altaret që i kishte ngritë n'malin e shpisë së Jehovait edhe n'Jerusalem. Ka urdhëru me i qitë jashtë qytetit.
16 E ka përgatitë edhe altarin e Jehovait, edhe ka nisë me bo mbi të kurbane t'bashkësisë edhe kurbane falënderimi. Gjithashtu u ka thanë njerëzve t'Judës me i shërby Jehovait, Zotit t'Izraelit.
17 Megjithatë, populli ka vazhdu me bo kurbane n'vendet e nalta, ama veç për Jehovain, Zotin e tyne.
18 Krejt senet tjera për historinë e Manases, lutja e tij te Zoti i vet, edhe fjalët që ia kanë thanë ata që shihshin vegime n'emër t'Jehovait, Zotit t'Izraelit, janë t'shkrume n'kronikën e mbretënve t'Izraelit.
19 N'shkrimet e atyne që shihshin vegime janë t'shkrume lutja e tij edhe qysh Zoti ia ka ni lutjet që ia ka bo me krejt zemër. Aty janë t'shkrume edhe krejt gjynahet e tij, pabesia e tij, edhe vendet ku i ka ngritë vendet e nalta, shtyllat e shenjta edhe idhujt, para se me e përulë veten.
20 N'fund Manase ka vdekë, edhe e kanë varrosë afër shpisë së vet. Mas tij, djali i vet, Amoni, u bo mbret.
21 Amoni u bo mbret kur i ka pasë 22 vjet, edhe ka sundu dy vjet n'Jerusalem.
22 Qashtu qysh ka bo baba i vet, Manase, edhe aj ka vazhdu me bo qka u konë e keqe n'sytë e Jehovait. Amoni u ka bo kurbane krejt idhujve që i kishte bo baba i vet, Manase, edhe i ka adhuru ata.
23 Ama ndryshe pi babës t'vet, Manases, aj s'e ka përulë veten para Jehovait. Përkundrazi, Amoni ka vazhdu me e shtu fajin e vet gjithnji e ma shumë.
24 N'fund, shërbëtorët e tij kanë bo komplot kundër tij edhe e kanë vra n'shpinë e vet.
25 Ama populli i vendit i ka vra krejt ata që kishin bo komplot kundër mbretit Amon, edhe e kanë bo mbret djalin e tij, Josinë.