Letra i parë te Timoteut 3
1 Kjo fjalë asht e besueshme: Nëse nji burrë mundohet me u bo mbikëqyrës, po synon nji punë të mirë. 2 Prandaj mbikëqyrësi duhet me qenë njeri që s’ka qka me ju qortu, burrë i nji gruaje të vetme, i përmbajtun në zakonet e veta. Duhet me pasë gjykim të shëndoshë, me qenë i rregullt, mikpritës edhe i aftë me mësu. 3 Nuk duhet me qenë pijanec, as i dhunshëm, po i arsyeshëm, jo grindavec edhe jo njeri që i don paret. 4 Duhet me qenë burrë që e udhëheq mirë shpinë e vet, edhe që ka fmi të bindun e me sjellje të mirë. 5 Sepse nëse dikush nuk din me udhëheqë shpinë e vet, qysh ka me u kujdesë për kongregacionin e Zotit? 6 Nuk duhet me qenë i sapokthyem në besim, që mos me u fry pi krenaria edhe me marrë gjykimin që ju dha Djallit. 7 Përveç kësaj, duhet me pasë emën të mirë te ata që janë jashtë, që mos me pasë qka me ju qortu edhe mos me ra në kurthin e Djallit.
8 Edhe ndihmësit e shërbimit duhet me qenë seriozë. Nuk duhet me folë me dy gojë, as me pi tepër venë, as me lakmu fitim të pandershëm. 9 Duhet ta ruajnë sekretin e shenjtë të besimit me ndërgjegje të pastër.
10 Edhe këta së pari duhet me u provu a janë të përshtatshëm. Pastaj, nëse janë pa akuzë, munden me shërby.
11 Edhe gratë duhet me qenë serioze. Nuk duhet me qenë shpifëse, po të përmbajtuna në zakonet e tyne edhe besnike në gjithçka.
12 Nji ndihmës shërbimi duhet me qenë burrë i nji gruaje të vetme, edhe duhet me i udhëheqë mirë fmitë e vet edhe shpinë e vet. 13 Sepse burrat që shërbejnë mirë fitojnë emën të mirë edhe munden me folë lirshëm e hapur në besimin në Krishtin Jezus.
14 Po t’i shkruj këto, edhe pse shpresoj me ardhë shpejt te ti. 15 Po nëse vonohem, dua ta dish qysh duhet me u sjellë në shpinë e Zotit, në kongregacionin e Zotit të gjallë, që asht shtyllë edhe mbështetje e së vërtetës. 16 Po, sekreti i shenjtë i këtij përkushtimi ndaj Zotit asht pa dyshim i madh: „Aj u shfaq si njeri edhe u shpall i drejtë si frymë. Ju shfaq melaqeve edhe u prediku mes kombeve. U besua në botë edhe u mor në lavdi.“