Libri i dytë i Musës 30
1 Ndërto nji altar pi drunit t’akacies për me djegë temjan.
2 Aj ka me qenë katror, nji bërryl i gjatë, nji bërryl i gjanë edhe dy bërryla i naltë. Brinat e tij duhet me qenë nji copë me altarin.
3 Mbuloje me ar t’pastër përmi edhe n’krejt anët, bashkë me brinat, edhe banja nji buzë pi ari rreth e rrotull.
4 Nën atë buzë, n’dy anët që jonë përballë njana-tjetrës, vnoja ka dy unaza pi ari, për me i mbajtë shufrat e bartjes.
5 Shufrat bani pi dru t’akacies edhe mbuloji me ar.
6 Vnoje altarin para perdes, te arka me pllakat e ligjit, përpara kapakut që asht mbi dëshminë, aty ku kom me u taku me ty.
7 Aaroni ka me djegë temjan me erë t’mirë mbi altar, kur merret me kandilat n’mëngjes.
8 Edhe kur i ndez kandilat n’muzg të mbramjes, Aaroni ka me djegë temjan. Ky kurban ka me u dhanë rregullisht para Jehovës, brez mas brezi.
9 N’këtë altar s’guxoni me djegë temjan që s’asht i lejum, as me dhanë kurbane që digjen krejt, as kurbane me drithë, edhe as me derdhë mbi të kurban pije.
10 Aaroni ka me ba shlyerje për mëkate te brinat e altarit nji herë n’vit. Aj ka me përdorë pak gjak pi kurbanit për mëkat që jepet për shlyerje, për me ba shlyerje për altarin. Kjo ka me u ba nji herë n’vit, brez mas brezi. Ky altar asht shumë i shenjtë për Jehovën.“
11 Pastaj Jehovai i ka thanë Moisiut:
12 „Kur t’i numrosh bijtë e Izraelit, secili që numrohet duhet me i dhanë Jehovës nji pagesë për me e shpengu jetën e vet. Kështu s’ka me i goditë naj murtajë kur t’regjistrohet numri i tyne.
13 Secili që regjistrohet duhet me dhanë këtë pagesë: gjysë shekeli, sipas shekelit që përdoret n’vendin e shenjtë. Nji shekel i ka 20 gera. Gjysë shekeli asht kontributi për Jehovën.
14 Secili që regjistrohet edhe i ka 20 vjet a ma shumë, duhet me e dhanë kontributin për Jehovën.
15 I pasuni s’ka me dhanë ma shumë se gjysë shekeli, e i vorfni s’ka me dhanë ma pak, si kontribut për Jehovën për me ba shlyerje për jetën e vet.
16 Merri paret e argjendta që izraelitët i japin për shlyerjen e jetës së tyne, edhe përdori për shërbimin n’tendën e takimit. Kjo ka me shërby si kujtim për izraelitët para Jehovës, që me u ba shlyerje për jetën tuej.“
17 Jehovai i ka thanë prapë Moisiut:
18 „Bane nji legen pi bakri, bashkë me nji mbajtëse, për me u la. Vnoje mes tendës së takimit edhe altarit, edhe mbushe me ujë.
19 Aaroni edhe djemt e tij le t’i lajnë aty durt edhe kambët.
20 Kur t’hyjnë n’tendën e takimit, a kur t’i afrohen altarit për me e kry shërbimin e tyne edhe për me i djegë kurbanet për Jehovën derisa t’bohen tym, duhet me u la me ujë, që mos me vdekë.
21 Ata duhet me i la durt edhe kambët, që mos me vdekë. Ky rregull ka me vlejt përgjithmonë për ta, për Aaronin edhe pasardhësit e tij, brez mas brezi.“
22 Pastaj Jehovai i ka thanë Moisiut:
23 „Tash merri erëzat ma t’mira: 500 njësi mirrë të ngurtësume, gjysmën e asaj sasie kanellë me erë t’mirë, domethanë 250 njësi, edhe 250 njësi kallam aromatik,
24 500 njësi kasie, t’matuna sipas shekelit që përdoret n’vendin e shenjtë, edhe nji hin vaj ullini.
25 Pi këtyne përgatite nji vaj të shenjtë për vajosje, nji përzimje të bame me mjeshtri. Ky ka me qenë vaj i shenjtë për vajosje.
26 Me atë vaj vajose tendën e takimit, arkën me pllakat e ligjit,
27 tavolinën edhe mbajtësen e kandilave, bashkë me krejt sendet që ju takojnë, altarin e temjanit,
28 altarin e kurbaneve që digjen krejt, bashkë me sendet që i takojnë, edhe legenin me mbajtësen e tij.
29 Bani këto sende t’shenjta, që me qenë shumë t’shenjta. Kushdo që i prek, ka me qenë i shenjtë.
30 Vajose edhe Aaronin me djemt e tij edhe bani t’shenjtë, që me m’shërby si priftërinj.
31 Folju izraelitëve edhe thujau: ‘Ky vaj ka me qenë gjithmonë vaj i shenjtë për vajosje për mu, brez mas brezi.
32 S’guxon me u ly mbi trupin e kujtdo, edhe s’guxoni me përgatitë tjetër vaj me të njejtën përbamje. Ky asht diçka e shenjtë, edhe për ju duhet me mbetë i shenjtë.
33 Kush e përgatit nji vaj të tillë edhe e përdor për dikon që s’e ka të drejtën, duhet me u përjashtu pi popullit të vet.’“
34 Jehovai i ka thanë prapë Moisiut: „Merri këto erëza aromatike, krejt n’sasi t’barabarta: pika stakte, onika, galbanum me erë t’mirë edhe temjan t’pastër.
35 Pi këtyne përgatit temjan. Përbërësit duhet me u përzi me mjeshtri edhe me ju qitë kripë. Temjani duhet me qenë i pastër edhe i shenjtë.
36 Nji pjesë shtype derisa t’bahet pluhun i imët, edhe pak pi tij vnoje para arkës me pllakat e ligjit, n’tendën e takimit, aty ku kom me u taku me ty. Për ju kjo ka me qenë diçka shumë e shenjtë.
37 Mos përgatitni për veti temjan me këtë përbamje. Duhet me e konsideru si diçka t’shenjtë për Jehovën.
38 Kush përgatit diçka të tillë veç për me e shiju erën e tij, duhet me u përjashtu pi popullit të vet.“