Libri i dytë i Musës 35
1 Ma vonë, Moisiu e ka mbledh krejt bashkësinë e izraelitëve edhe u ka thanë: «Jehovai ka urdhnu që me i zbatu këto gjana:
2 Gjashtë ditë keni me punu, po dita e shtatë ka me konë e shenjtë për ju, nji sabat për Jehovain, ditë që keni me pushu krejt. Kushdo që punon atë ditë, ka me u dënu me vdekje.
3 Ditën e sabatit s'guxoni me ndez zjarr në asnji vend ku banoni.»
4 Pastaj Moisiu i ka thanë krejt bashkësisë së izraelitëve: «Jehovai ka urdhnu kështu:
5 ‘Mblidhni dhurata për Jehovain. Secili pi ju që ka dëshirë me zemër me i dhanë diçka Jehovait, le ta bjen: ari, argjendi, bakri,
6 pe të kaltër, lesh ngjyrë purpuri, pe të kuq të mbyllt, pëlhurë lini të hollë, qime dhish,
7 lëkura deshësh të lyme me ngjyrë të kuqe, lëkura fokash, dru akacie,
8 vaj për llampa, balsam për vajin e lyerjes edhe temjan me erë të mirë,
9 gurë oniksi edhe gurë tjerë për me i vendos në efod edhe në xhepin e gjoksit.
10 Krejt ata ndër ju që jonë të zotë me punu me dorë, le të vijnë edhe le t'i bojnë krejt gjanat që Jehovai ka urdhnu:
11 tendën e shenjtë, bashkë me çadrën e saj edhe mbulesën, kapëset, kornizat, shufrat, shtyllat edhe bazat ku futen shtyllat,
12 arkën e besëlidhjes edhe shufrat e saj, kapakun edhe perden që e ndan vendin,
13 tavolinën, shufrat e saj edhe krejt sendet që i takojnë, bashkë me bukët që qiten përpara Jehovait,
14 shandanin me krejt sendet që i takojnë, llampat e tij edhe vajin për ndriçim,
15 altarin e temjanit edhe shufrat e tij, vajin e lyerjes edhe temjanin me erë të mirë, perden për hyrjen e tendës së shenjtë,
16 altarin për kurbanet që digjen krejt, bashkë me rrjetën e tij pi bakri, shufrat edhe krejt sendet që i takojnë, legenin edhe bazën e tij,
17 perdet e oborrit, shtyllat edhe bazat ku futen ato, perden për hyrjen e oborrit,
18 kunjat e tendës së shenjtë edhe kunjat e oborrit, bashkë me litarët që u takojnë,
19 rrobat e enduna hollë për shërbim në vendin e shenjtë, rrobat e shenjta për priftin Aaron edhe rrobat e priftërisë për djemtë e tij.’»
20 Atëherë krejt bashkësia e izraelitëve u largu pi Moisiu.
21 Pastaj kanë ardh krejt ata që e kanë ni me zemër edhe që shpirti i ka shty me dhanë diçka. Ata i kanë pru dhuratat e veta për Jehovain, që me u përdor për tendën e takimit, për krejt shërbimin që bohej aty edhe për rrobat e shenjta.
22 Burra e gra, krejt ata që kanë pas dëshirë me zemër, kanë ardh edhe kanë pru kapëse, vathë, unaza e stoli tjera, bashkë me gjithfarë sendesh pi ari. Krejt këta i kanë dhanë Jehovait dhuratat e veta pi ari.
23 Kush ka pas pe të kaltër, lesh ngjyrë purpuri, pe të kuq të mbyllt, pëlhurë lini të hollë, qime dhish, lëkura deshësh të lyme me të kuqe edhe lëkura fokash, i ka pru ato.
24 Krejt ata që kanë dhanë argjend e bakër, i kanë dhanë si dhuratë për Jehovain. Edhe kush ka pas dru akacie për ndërtim, e ka pru.
25 Krejt gratë që kanë ditë me punu mirë me dorë, kanë tjerrë vetë pe të kaltër, lesh ngjyrë purpuri, pe të kuq të mbyllt edhe fije lini të hollë, e pastaj e kanë pru atë që e kanë tjerrë.
26 Edhe krejt gratë që kanë ditë me tjerrë e që e kanë ni me zemër, kanë tjerrë qimet e dhive.
27 Të parët e popullit kanë pru gurë oniksi edhe gurë tjerë për me i vendos në efod edhe në xhepin e gjoksit.
28 Kanë pru edhe balsamin edhe vajin për ndriçim, për vajin e lyerjes edhe për temjanin me erë të mirë.
29 Krejt burrat e gratë që e kanë ni me zemër me dhanë diçka, kanë ndihmu me dhuratat e veta për punën që Jehovai e ka urdhnu nëpërmjet Moisiut. Izraelitët i kanë pru këto si dhurata vullnetare për Jehovain.
30 Pastaj Moisiu u ka thanë izraelitëve: «Jehovai e ka zgjedh Becalelin, djalin e Urit, që u konë djali i Hurit, pi fisi i Judës.
31 E ka mbush me frymën e Zotit edhe i ka dhanë mençuri, kuptim e dituni për gjithfarë punësh që bohen me dorë,
32 që me ba plane, me punu me ari, argjend e bakër,
33 me i punu gurët e me i vendos në vend, edhe me ba gjithfarë sendesh të bukura pi drunit.
34 Aj ia ka qitë në zemër Becalelit edhe Oholiabit, djalit të Ahisamakut, pi fisi i Danit, që me i mësu edhe tjerët.
35 U ka dhanë zotësi me i bo krejt punët e nji mjeshtri, të atij që qëndis, të atij që end edhe të atij që end me ngjyra të ndryshme, tue përdor pe të kaltër, lesh ngjyrë purpuri, pe të kuq të mbyllt edhe fije lini të hollë. Këta burra kanë me bo gjithfarë punësh edhe kanë me përgatit plane për gjithfarë sendesh.»