Libri i katërt i Musës 3
1 Këta jonë pasardhësit e Aronit edhe të Musës, në kohën kur Jehovai ka fol me Musën në malin Sinai:
2 Djemtë e Aronit i kanë pas emnat Nadab, aj u konë i parëlinduni, Abihu, Eleazar edhe Ithamar.
3 Këta jonë konë emnat e djemve të Aronit, priftërinjtë e vajosun që u caktun me shërby si priftërinj.
4 Po Nadabi edhe Abihu kanë dekë para Jehovait, kur në shkretinën e Sinait kanë ofru para Jehovait zjarr që s'ju lejohej me e ofru. Ata s'kanë pas djem. Kurse Eleazari edhe Ithamari kanë vazhdu me shërby si priftërinj bashkë me babën e vet, Aronin.
5 Masanej Jehovai i tha Musës:
6 “Thirre fisin e Levit me ardh edhe me u rreshtu para priftit Aron. Ata kanë me i shërby atij.
7 Ata kanë me i kry detyrat që i kanë ndaj tij edhe ndaj krejt bashkësisë para tendës së takimit, tu i kry punët që kanë të bajnë me tendën e shenjtë.
8 Ata kanë me u kujdes për krejt senet që i takojnë tendës së takimit edhe kanë me i kry detyrat që i kanë ndaj izraelitëve, tu i kry krejt punët që kanë të bajnë me tendën e shenjtë.
9 Jepja levitët Aronit edhe djemve të tij. Këta jonë dhanë për të pi mesi i izraelitëve.
10 Caktoje Aronin edhe djemtë e tij me i kry detyrat si priftërinj. E kushdo që s'ka të drejtë me u afru e afrohet, ka me u dënu me vdekje.”
11 Jehovai i tha prapë Musës:
12 “Unë vet po i marr levitët pi mesi i izraelitëve, në vend të krejt të parëlindunve të izraelitëve. Levitët kanë me m'taku mu.
13 Se çdo i parëlindun më takon mu. Atë ditë kur i kom vra krejt të parëlindunit në Egjipt, i kom shenjtëru për veti krejt të parëlindunit në Izrael, si të njerzve, si të kafshëve. Ata kanë me m'taku mu. Unë jom Jehovai.”
14 Jehovai i tha prapë Musës në shkretinën e Sinait:
15 “Regjistroji krejt meshkujt pi pasardhësit e Levit, që jonë prej moshës nji muj e përpjetë, simas familjeve të mdhaja edhe familjeve të tyne.”
16 Atëherë Musa i ka regjistru ata simas urdhrit të Jehovait, qysh i u konë urdhnu.
17 Djemtë e Levit i kanë pas emnat Gershon, Kehath edhe Merari.
18 Emnat e djemve të Gershonit, simas familjeve të tyne, jonë konë Libni edhe Shimei.
19 Djemtë e Kehathit, simas familjeve të tyne, jonë konë Amrami, Jizhari, Hebroni edhe Uzieli.
20 Djemtë e Merarit, simas familjeve të tyne, jonë konë Mahli edhe Mushi. Këto jonë konë familjet e levitëve, simas familjeve të tyne të mdhaja.
21 Pi Gershonit kanë ardh familja e Libnit edhe familja e Shimeit. Këto jonë konë familjet e gershonitëve.
22 Krejt meshkujt e regjistrum, që jonë konë prej moshës nji muj e përpjetë, jonë konë 7 500 veta.
23 Familjet e gershonitëve e kanë pas kampin mbrapa tendës së shenjtë, kah perëndimi.
24 Kryetari i familjes së madhe të gershonitëve u konë Eljasafi, djali i Laelit.
25 Djemtë e Gershonit e kanë pas për detyrë me u kujdes për tendën e shenjtë edhe tendën e takimit, për mbulesën e saj, për perden te hyrja e tendës së takimit,
26 për perdet rreth oborrit, për perden te hyrja e oborrit që e rrethonte tendën e shenjtë edhe altarin, për litarët e tendës edhe për krejt punët që kanë pas të bajnë me këto sene.
27 Pi Kehathit kanë ardh familja e Amramit, familja e Jizharit, familja e Hebronit edhe familja e Uzielit. Këto jonë konë familjet e kehathitëve.
28 Krejt meshkujt që jonë konë prej moshës nji muj e përpjetë jonë konë 8 600 veta. Ata e kanë pas për detyrë me u kujdes për vendin e shenjtë.
29 Familjet e djemve të Kehathit e kanë pas kampin në anën jugore të tendës së shenjtë.
30 Kryetari i familjes së madhe ku bajshin pjesë familjet e kehathitëve u konë Elizafani, djali i Uzielit.
31 Ata e kanë pas për detyrë me u kujdes për arkën e besëlidhjes, për tavolinën, për shandanin, për altarët, për senet që përdoreshin për shërbimin në vendin e shenjtë, për perden edhe për krejt punët që kanë pas të bajnë me këto sene.
32 Kryetari ma i naltë i levitëve u konë Eleazari, djali i priftit Aron. Aj i ka mbikëqyr ata që i kryjshin detyrat në vendin e shenjtë.
33 Pi Merarit kanë ardh familja e Mahlit edhe familja e Mushit. Këto jonë konë familjet e Merarit.
34 Krejt meshkujt e regjistrum, që jonë konë prej moshës nji muj e përpjetë, jonë konë 6 200 veta.
35 Kryetari i familjes së madhe ku bajshin pjesë familjet e Merarit u konë Zurieli, djali i Abihajilit. Ata e kanë pas kampin në anën veriore të tendës së shenjtë.
36 Djemtë e Merarit e kanë pas për detyrë me u kujdes për kornizat e tendës së shenjtë, për shufrat, shtyllat, bazat ku futeshin shtyllat, për krejt pajisjet e saj edhe për krejt punët që kanë pas të bajnë me këto sene,
37 edhe për shtyllat rreth oborrit, bazat e tyne, kunjat e tendës edhe litarët e saj.
38 Përpara tendës së shenjtë, në anën lindore, përpara tendës së takimit kah lind dielli, e kanë pas kampin Musa, Aroni edhe djemtë e tij. Ata e kanë pas për detyrë me u kujdes për vendin e shenjtë. Këtë detyrë e kanë kry për izraelitët. E kushdo që s'kish të drejtë me u afru e afrohej, ka pas me u dënu me vdekje.
39 Krejt levitët meshkuj, që jonë konë prej moshës nji muj e përpjetë, e që Musa edhe Aroni i kanë regjistru simas familjeve të tyne, me urdhër të Jehovait, jonë konë 22 000 veta.
40 Masanej Jehovai i tha Musës: “Regjistroji krejt meshkujt e parëlindun të izraelitëve, që jonë prej moshës nji muj e përpjetë. Numroji edhe shënoji emnat e tyne.
41 Merri levitët për mu, në vend të krejt të parëlindunve të izraelitëve, unë jom Jehovai. Edhe kafshët e shpisë të levitëve merri në vend të krejt kafshëve të parëlinduna të shpisë të izraelitëve.”
42 Atëherë Musa i ka regjistru krejt të parëlindunit e izraelitëve, qysh e kish urdhnu Jehovai.
43 Krejt meshkujt e parëlindun, që jonë konë prej moshës nji muj e përpjetë e që u regjistrun me emën, jonë konë 22 273 veta.
44 Jehovai i tha prapë Musës:
45 “Merri levitët në vend të krejt të parëlindunve të izraelitëve, edhe kafshët e shpisë të levitëve në vend të kafshëve të tyne të shpisë. Levitët kanë me m'taku mu. Unë jom Jehovai.
46 Për me i liru ata 273 të parëlindun të izraelitëve që jonë ma shumë se levitët, duhet me pagu nji çmim për lirimin e tyne.
47 Për secilin merr nga 5 shekelë, simas shekelit standard të vendit të shenjtë. Nji shekel i ka 20 gera.
48 Paret jepja Aronit edhe djemve të tij, si çmim për lirimin e atyne që jonë tepër.”
49 Atëherë Musa i ka marrë paret për lirimin e atyne të parëlindunve që jonë konë tepër, masi levitët u llogaritën si çmim për lirimin e të tjerëve.
50 Pi të parëlindunit e izraelitëve i ka marrë 1 365 shekelë, simas shekelit të vendit të shenjtë.
51 Masanej Musa ia ka dhanë paret e lirimit Aronit edhe djemve të tij, qysh e kish thanë Jehovai edhe qysh e kish urdhnu Jehovai Musën.