Libri i parë i Musës 13
1 Pastaj Ạbrami ka dalë pi Egjiptit bashkë me grunë e vet edhe me krejt pasuninë që e ka pasë, edhe ka shku me Lotin për në Nẹgeb.
2 Ạbrami ka pasë shumë bagëti, argjend edhe ari.
3 Rrugës pi Nẹgeb për në Bẹthel, aj ka ndalë disa herë me i ngrehë çadrat, derisa ka mbërri te vendi mes Bẹthelit edhe Ait, ku e ka pasë çadrën edhe ma herët.
4 Qaty u konë vendi ku aj e ka ndërtu nji altar ma përpara. Aty Ạbrami e ka thirrë emnin e Jehovait.
5 Edhe Loti, që ka udhëtu bashkë me Ạbramin, ka pasë dele, lopë e qe, edhe çadra.
6 Për qata, s'ka mujtë me nejtë krejt bashkë në të njejtin vend. Pasunia e tyne u konë ba aq e madhe, sa s'kanë mujtë ma me jetu bashkë.
7 Për shkak të kësaj, ka nisë nji grindje mes barive të bagëtive të Ạbramit edhe barive të Lotit. (N'atë kohë, Kanaanịtët edhe Perisịtët kanë jetu në atë vend.)
8 Atëherë Ạbrami i ka thanë Lotit: „Të lutna, mos të ketë grindje mes meje e teje, as mes barive të mi edhe barive tu, se na jemi vllazën.
9 Krejt vendin e ki përpara. Ma mirë asht me u nda. Nëse ti shkon në të majtë, unë shkoj në të djathtë. E nëse ti shkon në të djathtë, unë shkoj në të majtë.“
10 Atëherë Loti ka kqyrë përreth edhe e ka pa që krejt vendi përreth Jordanit ka pasë ujë me bollëk. (Kjo u konë para se Jehovai me i shkatërru Sọdomen edhe Gomọrrën.) Deri në Zọar, ajo anë u konë si kopshti i Jehovait, si vendi i Egjiptit.
11 Pastaj Loti e ka zgjedhë për veti krejt vendin përreth Jordanit edhe i ka çu çadrat kah lindja. Kështu, ata të dy jonë nda.
12 Ạbrami ka jetu në vendin e Kạnaanit, kurse Loti ka jetu mes qyteteve të asaj ane. Në fund, Loti e ka ngrehë çadrën e vet afër Sọdomes.
13 Njerëzit e Sọdomes jonë konë të këqij edhe kanë ba gjynahe të randa kundër Jehovait.
14 Mas Loti u nda pi Ạbramit, Jehovai i ka thanë Ạbramit: „Të lutna, kqyr pi vendi ku je tu nejtë, kah veriu, jugu, lindja edhe perëndimi,
15 se krejt vendin që po e sheh, kom me ta dhanë ty edhe pasardhësve tu si pasuni përgjithmonë.
16 Kom me i ba pasardhësit tu sa kokrrat e pluhnit në tokë. Nëse dikush kish mujtë me i numëru kokrrat e pluhnit të tokës, atëherë kish mujtë me i numëru edhe pasardhësit tu.
17 Çohu, shko nëpër krejt vendin, sa asht i gjatë e sa asht i gjanë, se ty kom me ta dhanë.“
18 Ạbrami ka vazhdu me jetu në çadra. Ma vonë ka ardhë te drunjtë e mëdhenj të Mạmres, në Hẹbron. Aj ka nejtë aty edhe ka ndërtu nji altar për Jehovain.