Libri i parë i Musës 15
1 Mas kësaj, Ạbrami ka marrë nji mesazh pi Jehovai në nji vegim. Jehovai i ka thanë: „Mos ki frikë, Ạbram. Unë jom mburoja jote. Shpërblimi yt ka me konë shumë i madh.“
2 Ạbrami i asht përgjigjë: „O Zot Jehova, që ke pushtet mbi krejt, qka ki me më dhanë, kur unë s'kom fëmijë, e shpinë teme ka me e trashëgu Eliẹseri, nji burrë pi Damạskusi?“
3 Ạbrami ka vazhdu me thanë: „Ti s'më ke dhanë pasardhës, edhe dikush pi shpisë teme ka me konë trashëgimtari jem.“
4 Po Jehovai i asht përgjigjë me këto fjalë: „Jo ky njeri s'ka me të trashëgu, po djali yt.“
5 Pastaj Jehovai e ka çu Ạbramin jashtë edhe i ka thanë: „Të lutna, kqyr n'qiell edhe numëroji yjet, nëse munesh.“ Masanej i ka thanë: „Qaq shumë kanë me konë pasardhësit tu.“
6 Ạbrami i ka besu Jehovait, edhe Zoti ia ka llogaritë këtë si drejtësi.
7 Përveç kësaj, i ka thanë: „Unë jom Jehovai, që të kom nxjerrë pi Urit, qytetit të Kaldeasve, me ta dhanë qit vend si pasuni.“
8 Atëherë Ạbrami e ka vetë: „O Zot Jehova, që ke pushtet mbi krejt, qysh muj me e ditë që ky vend ka me u ba i jemi?“
9 Zoti i asht përgjigjë: „Merre për mu nji lopë tri vjeçe, nji dhi tri vjeçe, nji dash tri vjeç, nji turtull edhe nji pëllumb të ri.“
10 Atëherë Ạbrami i ka marrë kafshët, i ka pre në dy pjesë edhe i ka qitë pjesët përballë njana-tjetrës. Po shpendët s'i ka pre në dy pjesë.
11 Kur shpendët grabitqarë kanë nisë me u lëshu mbi kafshët e ngordhuna, Ạbrami vazhdimisht i ka përzanë.
12 Kur dielli u konë tu perëndu, Ạbramin e ka marrë nji gjumë i randë, edhe mbi të ka ra nji terr i madh që ia ka shti frikën.
13 Pastaj Zoti i ka thanë Ạbramit: „Dije mirë që pasardhësit tu kanë me jetu si të huej në nji vend të huej. Aty kanë me i ba skllevër edhe kanë me i shtypë për 400 vjet.
14 Po unë kom me e dënu popullin që kanë me i shërby, edhe masanej ata kanë me dalë pi aty me shumë pasuni.
15 E ti vet ki me vdekë në paqe, kur të jesh goxha i moshuem, edhe kanë me të varrosë.
16 Në brezin e katërt, pasardhësit tu kanë me u kthy këtu, se gjynahet e Amorịtëve hala s'e kanë mbushë masën.“
17 Kur dielli ka perëndu edhe u ba shumë terr, u shfaq nji furrë që qitte tym, edhe nji pishtar i ndezun ka kalu mes copave të mishit.
18 Atë ditë, Jehovai e ka lidhë nji besë me Ạbramin. I ka premtu: „Pasardhësve tu kom me ua dhanë qit vend, pi lumit të Egjiptit deri te lumi i madh, Eufrati:
19 vendin e Kenịtëve, Kenisịtëve, Kadmonịtëve,
20 Hethịtëve, Perisịtëve, Rẹphaïmëve,
21 Amorịtëve, Kanaanịtëve, Girgaschịtëve edhe Jebusịtëve.“