Libri i parë i Musës 46
1 Kështu Izraeli e ka nis rrugën me krejt qka ka pasë. Kur ka mrrijt në Beer-Sheba, i ka ba kurban Zotit të babës së vet, Isakut.
2 Pastaj, natën, Zoti i ka folë Izraelit në nji vegim edhe i ka thanë: „Jakob, Jakob!“ Aj i ka thanë: „Qe ku jom!“
3 Zoti i ka thanë: „Unë jom Zoti i vërtetë, Zoti i babës tand. Mos u tut me shku në Egjipt, se atje kam me ba pi teje nji popull t’madh.
4 Unë vetë kam me shku me ty në Egjipt, edhe unë vetë kam me t’kthy prapë pi atje. Edhe Jozefi ka me ta vnu dorën përmi sy.“
5 Mas kësaj, Jakobi u nis pi Beer-Sheba. Djemtë e Izraelit e kanë hyp babën e tyne Jakobin, fmitë edhe gratë e tyne në karrocat që i ka çu faraoni për me e marrë.
6 I kanë marrë me veti tufat e bagëtive edhe krejt gjanat tjera që i kanë fitu në vendin e Kanaanit. Kështu Jakobi ka ardh në Egjipt bashkë me krejt pasardhësit e vet.
7 Aj i ka marrë me veti në Egjipt djemtë e vet, nipat, çikat edhe mbesat, krejt pasardhësit e vet.
8 Qita jonë emnat e djemve të Izraelit, domethanë të Jakobit, që kanë ardh në Egjipt: Djali i parë i Jakobit u konë Rubeni.
9 Djemtë e Rubenit jonë konë Hanoku, Pallui, Hezroni edhe Karmi.
10 Djemtë e Simeonit jonë konë Jemueli, Jamini, Ohadi, Jakini, Zohari edhe Shauli, që u konë djali i nji gruje kanaanite.
11 Djemtë e Levit jonë konë Gershoni, Kehati edhe Merari.
12 Djemtë e Judës jonë konë Eri, Onani, Shela, Perezi edhe Zerahu. Po Eri edhe Onani
kanë vdekë në vendin e Kanaanit. Djemtë e Perezit jonë konë Hezroni edhe Hamuli.
13 Djemtë e Isakarit jonë konë Tola, Puva, Jobi edhe Shimroni.
14 Djemtë e Zebulonit jonë konë Seredi, Eloni edhe Jahleeli.
15 Këta jonë djemtë që Lea ia ka lindë Jakobit në Padan-Aram. Përveç tyne, ajo ia ka lindë edhe nji çikë, Dinën. Gjithsej i ka pasë 33 djem e çika.
16 Djemtë e Gadit jonë konë Zifjoni, Hagi, Shuni, Ezboni, Eri, Arodi edhe Areli.
17 Djemtë e Asherit jonë konë Jimna, Jishva, Jishvi edhe Beria. Motra e tyne
e ka pasë emnin Serah. Djemtë e Berias jonë konë Heberi edhe Malkieli.
18 Këta jonë djemtë e Zilpës, që Labani ia ka dhanë çikës së vet Leas. Pasardhësit e Zilpës edhe Jakobit jonë konë gjithsej 16 veta.
19 Djemtë e grusë së Jakobit, Rahelës, jonë konë Jozefi edhe Beniamini.
20 Jozefit i kanë lindë në Egjipt Manaseu edhe Efraimi. Ata ia ka lindë Asenata, çika e Potiferës, që u konë prift në On.
21 Djemtë e Beniaminit jonë konë Bela, Bekeri, Ashbeli, Gera, Naamani, Ehi, Roshi, Mupimi, Hupimi edhe Ardi.
22 Këta jonë pasardhësit e Rahelës edhe Jakobit, gjithsej 14 veta.
23 Djali i Danit u konë Hushimi.
24 Djemtë e Neftalit jonë konë Jahzeeli, Guni, Jezeri edhe Shilemi.
25 Këta jonë djemtë e Bilhës, që Labani ia ka dhanë çikës së vet Rahelës. Pasardhësit e Bilhës edhe Jakobit jonë konë gjithsej 7 veta.
26 Krejt bashkë jonë konë 66 veta që kanë rrjedh pi Jakobi edhe kanë shku me të në Egjipt, pa i numru gratë e djemve të Jakobit.
27 Jozefit i kanë lindë dy djem në Egjipt. Gjithsej, pi shpija e Jakobit kanë ardh në Egjipt 70 veta.
28 Jakobi e ka çu Judën përpara, me i kallxu Jozefit që aj u nis për në Goshen. Kur kanë mrrijt në vendin e Goshenit,
29 Jozefi ka urdhnu me ia ba gati karrocën edhe ka shku në Goshen për me e taku babën e vet, Izraelin. Sapo e ka pa, i ka ra në qafë edhe ka kajt për nji kohë të gjatë.
30 Izraeli i ka thanë Jozefit: „Tash jom gati me vdekë. T’kam pa me sytë e mi edhe e di që hala je gjallë.“
31 Pastaj Jozefi u ka thanë vllaznive të vet edhe krejt shpisë së babës së vet: „Tash kam me shku te faraoni edhe kam me i kallxu: ‚Vllaznit e mi edhe familja e babës tem, që jonë konë në vendin e Kanaanit, kanë ardh këtu.
32 Këta burra jonë barinj edhe merren me rritjen e bagëtive. I kanë marrë me veti tufat e tyne edhe krejt qka kanë.‘
33 Kur faraoni ju thirr edhe ju pyet: ‚Me qka merreni ju?‘,
34 atëherë thuji: ‚Na, shërbëtorët e tu, jemi marrë me rritjen e bagëtive qysh t’ri, qashtu qysh jonë marrë edhe t’parët tonë.‘ Kështu keni me mujt me nejt në vendin e Goshenit, se egjiptianëve ju vjen gërdi pi barinjve të deleve.“