Libri i pest i Musës 16
1 Mbaje mend muajin Abib edhe festoje Pashkën për Jehovën, Zotin tand, se në muajin Abib Jehovai, Zoti yt, të ka nxjerrë natën pi Egjiptit.
2 Ki me ia pru Jehovait, Zotit tand, kurbanin e Pashkës pi bagëtitë e vogla edhe të mëdhaja, në venin që Jehovai ka me e zgjedhë për emnin e vet.
3 Me qat kurban s’guxon me hangër kurgjo që ka tharm. Shtatë ditë ha bukë pa tharm, bukën e mjerimit, se ke dalë pi Egjiptit me nxitim të madh. Bone qashtu që me e kujtu tanë jetën ditën kur ke dalë pi Egjiptit.
4 Në krejt tokën tande, për shtatë ditë s’guxon me u gjetë te ti kurrfarë tharmi. Edhe pi mishit që ki me e bo kurban mramjen e ditës së parë, s’guxon me metë kurgjo gjatë natës deri në mëngjesin tjetër.
5 Kurbanin e Pashkës s’guxon me e pre në cilindo qytet që Jehovai, Zoti yt, ta ka dhanë.
6 Përkundrazi, në venin që Jehovai, Zoti yt, ka me e zgjedhë për emnin e vet, aty preje kurbanin e Pashkës në mramje, sapo të perëndon dielli, në kohën kur ke dalë pi Egjiptit.
7 Përgadite edhe haje në venin që Jehovai, Zoti yt, ka me e zgjedhë. Në mëngjes munesh me u kthy te çadrat tua.
8 Gjashtë ditë ha bukë pa tharm, e ditën e shtatë ka me pasë nji mbledhje të veçantë për Jehovën, Zotin tand. Atë ditë s’guxon me punu.
9 Numëro shtatë javë. Nise me i numëru qato shtatë javë kur për herë të parë e vnon drapnin te drithi që hala qëndron në arë.
10 Masanej festoje Festën e Javëve për Jehovën, Zotin tand, me nji dhuratë që e jep me qef pi dorës tande, simas bekimit që ta ka dhanë Jehovai, Zoti yt.
11 Gëzohu para Jehovait, Zotit tand, në venin që Jehovai, Zoti yt, ka me e zgjedhë për emnin e vet. Aty keni me u gëzu ti, djali yt, çika jote, skllavi yt, skllavja jote, leviti që jeton në qytetet e tua, i huji që banon mes juve, fmija pa babë edhe veja që jeton mes juve.
12 Kujtoje që u bone skllav në Egjipt, edhe ki kujdes me i majtë e me i zbatu këto rregulla.
13 Festoje Festën e Kasolleve për shtatë ditë, kur ta mbledhësh krejt prodhimin pi lamës tande edhe pi presës së vajit e të venës.
14 Gëzohu gjatë festës tande, ti, djali yt, çika jote, skllavi yt, skllavja jote, leviti, i huji që banon aty, fmija pa babë edhe veja që jeton në qytetet e tua.
15 Shtatë ditë festoje qat festë për Jehovën, Zotin tand, në venin që Jehovai ka me e zgjedhë, se Jehovai, Zoti yt, ka me ta beku krejt prodhimin edhe krejt punën që e bon. E ti veç gëzohu.
16 Tri herë në vjet krejt meshkujt duhet me dalë para Jehovait, Zotit tand, në venin që aj ka me e zgjedhë: në Festën e Bukëve pa Tharm, në Festën e Javëve edhe në Festën e Kasolleve. Askush s’guxon me dalë para Jehovait me duer thatë.
17 Secili le ta sjellë dhuratën e vet, simas bekimit që ia ka dhanë Jehovai, Zoti yt.
18 Në krejt qytetet që Jehovai, Zoti yt, po t’i jep, cakto për secilin fis gjykatës edhe zyrtarë. Ata duhet me e gjyku popullin drejt.
19 Mos e shtrembëro drejtësinë, mos maj anë edhe mos prano ryshfet, se ryshfeti ua verbon sytë edhe të mençurve edhe ua shtrembëron fjalët njerzve të drejtë.
20 Drejtësinë, veç drejtësinë, duhet me e ndjekë, që me metë gjallë edhe me e marrë si pronë tokën që Jehovai, Zoti yt, po ta jep.
21 Mos mbjell kurrfarë druni si shtyllë të shenjtë afër altarit të Jehovait, Zotit tand, që e ndërton për veti.
22 As mos e ngrit për veti nji shtyllë të shenjtë, se Jehovai, Zoti yt, e urren qat sen.