Nehemia 6
1 Kur Sanballati, Tobija, Geshemi, arabi, edhe armiqtë tjerë tonë e kanë marrë vesh që unë e kom ndërtu prapë murin edhe që s'ka mbetë ma asnji vrimë në të, edhe pse deri atëherë hala s'i kisha vnu dyert në porta,
2 Sanballati edhe Geshemi menjëherë më kanë çu fjalë: „Hajde, ta caktojmë nji kohë edhe të takohemi në fshatrat e fushës së Onos.“ Po në të vërtetë, ata po bojshin plane me më bo keq.
3 Për qata, unë ju kom çu lajmëtarë me ju thanë: „Jom tu e bo nji punë të madhe edhe s'muj me ardhë. Pse me e nalë punën tash, me e lanë krejt edhe me ardhë te ju?“
4 Ata ma kanë çu të njejtin lajm katër herë, edhe unë çdo herë ju kom dhanë të njejtën përgjigje.
5 Masanej Sanballati ma ka çu shërbëtorin e vet për herë të pestë me të njejtin lajm, edhe aj e ka pasë në dorë nji letër të hapun.
6 Në atë letër u shkru: „Nëpër popuj po flitet, edhe Geshemi po e thotë të njejtën, që ti bashkë me judenjtë po planifikoni me bo kryengritje. Për qata po e ndërton murin. Sipas këtyne fjalëve, ti po don me u bo mbreti i tyne.
7 Përveç kësaj, ti i ke caktu do profetë që me thirrë nëpër krejt Jerusalemin: ‚Juda ka mbret!‘ Kjo pa dyshim ka me i shku në vesh mbretit. Për qata, hajde të takohemi edhe të folim për këtë punë.“
8 Po unë i kom çu fjalë: „Kurgjo pi këtyne që po i thu s'ka ndodhë. Krejt këto i ke shpikë vetë.“
9 Se ata krejt veç dojshin me na tutë edhe po menojshin: „Kanë me ju lëshu duart pi frikës edhe s'kanë me e kry punën.“ Për qata, o Zot, të lutna, m'i forco duart!
10 Masanej unë kom shku te Shemaja, djali i Delajës, djali i Mehetabelit, që rrike i mbyllun në shpinë e vet. Aj më ka thanë: „Hajde ta caktojmë nji kohë edhe të takohemi në shpinë e Zotit të vërtetë, mrena në tempull. Kena me i mbyllë dyert e tempullit, se po dojnë me të vra. Ata kanë me ardhë natën me të vra.“
11 Po unë i kom thanë: „A me ikë nji njeri si unë? A munet nji njeri si unë me hy në tempull e me mbetë gjallë? Unë s'kam me hy aty!“
12 Atëherë e kom kuptu që Zoti s'e ka çu atë, po Tobija edhe Sanballati e kishin pagu që me profetizu kështu kundër meje.
13 Ata e kishin pagu për me më tutë edhe me më shty me bo gjynah. Kështu kishin me pasë nji arsye me ma prish emnin edhe me më bo të përbuzun.
14 O Zoti jem, mos harro qka kanë bo Tobija edhe Sanballati. Mos e harro as profeteshën Noadja edhe profetët tjerë, që vazhdimisht jonë mundu me më tutë!
15 Për 52 ditë muri u kry, më 25 të muajit Elul.
16 Kur krejt armiqtë tonë e kanë marrë vesh këtë, edhe kur krejt popujt përreth e kanë pa, ju ka ardhë shumë marre. Ata e kanë kuptu që na kemi mujt me e kry këtë punë veç me ndihmën e Zotit tonë.
17 Në atë kohë, burrat me ndikim të Judës i çojshin shumë letra Tobijës, edhe aj ju kthente përgjigje.
18 Shumë veta në Judë i kishin dhanë besën atij, se aj u konë dhondri i Shekanjës, djalit të Arahut, edhe djali i tij Jehohanani e kishte marrë për grue vajzën e Meshullamit, djalit të Berekjës.
19 Ata vazhdimisht më folshin mirë për Tobijën, e masanej shkojshin e ia kallxojshin atij qka kisha thanë unë. E Tobija vazhdimisht më çojke letra për me më tutë.