Visioni i Gjonit 20
1 Edhe e pashë nji melaqe tu zhdryp pi qiellit, me çelësin e humnerës pa fund edhe me nji zingjir të madh në dorë. 2 Aj e kapi dragoin, gjarpnin e vjetër, që asht Djalli edhe Satani, edhe e lidhi për 1000 vjet. 3 E gjujti në humnerën pa fund, masanej e msheli edhe e vulosi përmbi të, që mos me i mashtru ma popujt derisa të kryhen 1000 vjet. Mas kësaj duhet me u liru për pak kohë.
4 Edhe pashë frona, edhe atyne që rrishin përmbi ta ju dha pushtet me gjyku. Po, i pashë shpirtnat e atyne që ishin ekzekutu, se kishin dëshmu për Jezusin edhe kishin fol për Zotin, edhe të atyne që nuk e kishin adhuru bishën e egër as pamjen e saj, edhe nuk e kishin marrë shenjën në ballë e në dorë. Ata erdhën në jetë edhe sundun si mbreta me Krishtin për 1000 vjet. 5 (Të dekunit tjerë nuk erdhën në jetë derisa u kryn 1000 vjet.) Kjo asht ringjallja e parë. 6 Lum edhe i shenjtë asht aj që ka pjesë në ringjalljen e parë. Mbi kta deka e dytë s’ka pushtet, po ata kanë me qenë priftërinj të Zotit edhe të Krishtit, edhe kanë me sundu si mbreta me të gjatë 1000 vjetëve.
7 Sapo të kryhen 1000 vjet, Satani ka me u liru pi burgut të vet. 8 Aj ka me dalë me i mashtru popujt në katër qoshet e tokës, Gogun edhe Magogun, për me i mbledh për luftë. Ata janë aq shumë sa zalli i detit. 9 Edhe ata dolën përmbi krejt tokën edhe e rrethun kampin e të shenjtëve edhe qytetin e dashtun. Po zjarri zhdrypi pi qiellit edhe i përpiu. 10 Djalli, që i mashtronte, u gjujt në liqenin e zjarmit edhe të squfurit, ku ishin veç bisha e egër edhe profeti i rremë. Ata kanë me u mundu ditë e natë përgjithmonë e jetë e mot.
11 Edhe e pashë nji fron të madh të bardhë edhe Atë që rrinte përmbi të. Pi para tij ikën toka edhe qielli, edhe s’u gjet ma ven për ta. 12 Edhe i pashë të dekunit, të mëdhejtë edhe të vegjlit, tu nejt para fronit, edhe u hapën rrotullat. Po u hap edhe nji rrotull tjetër, rrotulla e jetës. Të dekunit u gjykun simas asaj që ishte shkru në rrotulla, simas veprave të tyne. 13 Edhe deti i qiti të dekunit që ishin në të, edhe deka e varri i qitën të dekunit që ishin në ta, edhe secili u gjykua veç e veç, simas veprave të veta. 14 Edhe deka e varri u gjujtën në liqenin e zjarmit. Liqeni i zjarmit paraqet dekën e dytë. 15Edhe kushdo që nuk ishte i shkruem në librin e jetës, u gjujt në liqenin e zjarmit.