Zakaria 3
1 Masanej aj ma ka kallxu kryepriftin Jozua, që rrike para melaqes së Jehovait. Në anën e djathtë t'tij rrike Shejtani, me iu kundërvu.
2 Melaqja e Jehovait i ka thanë Shejtanit: “Jehovai të qortoftë, o Shejtan! Po, Jehovai që e ka zgjedhë Jerusalemin, të qortoftë! A s’asht ky njeri si nji copë druni që u konë tu u djegë, e që e kanë nxjerrë pi zjarrit?”
3 Jozua rrike para melaqes me tesha t'flliqta.
4 Atëherë melaqja u ka thanë atyne që rrishin para tij: “Hiqjani teshat e flliqta.” Masanej iu ka kthy Jozuës edhe i ka thanë: “Kqyre, unë ta kom hjekë fajin, edhe kanë me t'veshë me tesha t'bukura e t'çmueshme.”
5 Atëherë unë kom thanë: “Vnojani nji çallmë t'pastër n'krye.” Kështu që ata ia kanë vnu nji çallmë t'pastër n'krye edhe e kanë veshë me tesha, kurse melaqja e Jehovait rrike aty.
6 Masanej melaqja e Jehovait ia ka shpallë Jozuës këto fjalë:
7 “Kështu thotë Jehovai, Zotnia i ushtrive: ‘Nëse ecë rrugëve t'mia edhe i kryn detyrat që i ke ndaj meje, atëherë ti ke me shërby si gjykatës n'shpinë teme edhe ke me u kujdes për oborret e mia. Unë kom me ta dhanë të drejtën me hy lirshëm, qysh e kanë këta që po rrijnë këtu.’
8 ‘Ngom mirë, o kryeprift Jozua, ti edhe priftat e tjerë që po rrijnë ulë para teje, se këta burra shërbejnë si nji shenjë. Kqyrni, unë kom me e pru shërbëtorin tem, që quhet “Filizi”!
9 Kqyrne gurin që e kom vnu para Jozuës! Mbi këtë gur t'vetëm janë shtatë sy, edhe unë kom me gdhendë nji shkrim n' të’, thotë Jehovai, Zotnia i ushtrive, ‘edhe unë kom me ia hjekë fajin këtij vendi n'nji ditë t'vetme.’
10 ‘Atë ditë’, thotë Jehovai, Zotnia i ushtrive, ‘secili pi juve ka me e thirrë kojshinë e vet me ardhë nën hardhinë e vet t'rrushit edhe nën fikun e vet.’”